Shkup, 15 korrik – Kryetari i Komunës së Tetovës, Bilall Kasami, ka prezantuar zyrtarisht programin për “Tetova n’festë 2025”, një festival kulturor dhe sportiv që do të zgjasë nga data 16 korrik deri më 3 gusht dhe që pritet të kthehet në një ndër ngjarjet më të mëdha verore në qytet.
Pjesa më e spikatur e festës do të jetë pa dyshim koncertet madhështore në shesh, ku pritet të performojnë emra të mëdhenj të skenës shqiptare si Alban Skenderaj (31 korrik), MC Kresha & Lyrical Son (29 korrik), Elita 5 (30 korrik), NRG Band, DJ Shock, si dhe shumë artistë të tjerë të njohur.
Në prezantimin e programit, kryetari Kasami theksoi se Tetova këtë verë do të jetë epiqendra e kulturës dhe argëtimit në rajon, duke u bërë vendtakim për qytetarët dhe artdashësit nga mbarë vendi dhe diaspora.
Programi përfshin gjithashtu net të rinore, net të filmit në ambient të hapur (24-25 korrik), aktivitete sportive si turne futbolli, basketbolli dhe gara biçikletash, si dhe net folklorike me ansamble nga Maqedonia, Shqipëria, Kosova dhe komunitetet e ndryshme etnike që jetojnë në Tetovë.
Eventi do të kulmojë më 3 gusht me një panair të artizanatit dhe traditave lokale, që synon të promovojë trashëgiminë kulturore të vendit dhe rajonit.
