Presidenti i SHBA-së, Donald Trump, urdhëroi të hënën një pauzë 90-ditore në ndihmën e jashtme për zhvillim në pritje të vlerësimeve të efikasitetit dhe konsistencës me politikën e tij të jashtme.
“Të gjithë krerët e departamenteve dhe agjencive me përgjegjësi për programet e ndihmës së huaj për zhvillim të Shteteve të Bashkuara, do të ndalojnë menjëherë detyrimet e reja dhe disbursimet e fondeve të ndihmës për zhvillim”, thuhej në urdhrin ekzekutiv të nënshkruar nga Trump, vetëm disa orë pasi ai mori detyrën për një mandat të dytë.
Nuk ishte menjëherë e qartë se sa i gjerë ishte urdhri dhe cilat programe, vende, organizata joqeveritare dhe organizata ndërkombëtare do të prekeshin nga ky veprim, transmeton Telegrafi.
Ishte gjithashtu e paqartë se çfarë financimi mund të shkurtohej, duke pasur parasysh se Kongresi i SHBA përcakton buxhetin federal të qeverisë amerikane.
Urdhri ekzekutiv i bën jehonë një kthimi në qasjen që mori Trump gjatë mandatit të tij të parë në detyrë midis 2017 dhe 2021.
Ai fillimisht erdhi në pushtet duke propozuar shkurtimin e rreth një të tretës së buxheteve të diplomacisë dhe ndihmës amerikane, të cilat përfshinin reduktime të mëdha në fondet për paqeruajtësit e OKB-së dhe organizatat ndërkombëtare. Por Kongresi i tërhoqi propozimet e Trump.
Më pas, në mbledhjen vjetore të liderëve botërorë në Kombet e Bashkuara në vitin 2018, Trump u ankua se SHBA ishte donatori më i madh i ndihmës së huaj, “por pak njerëz na japin diçka”.
“Kjo është arsyeja pse ne po e shohim me kujdes ndihmën e huaj të SHBA-së. Duke ecur përpara, ne do t’u japim ndihmë të huaj vetëm atyre që na respektojnë dhe, sinqerisht, janë miqtë tanë”, tha ai.
