Uashington, 26 gusht, argument.mk/ – Administrata e presidentit Donald Trump ka pezulluar përkohësisht takimet për vizat e emigracionit në ambasadat dhe konsullatat amerikane në të gjithë botën, raportoi “Reuters”.
Departamenti Amerikan i Shtetit (DASH) tha se në të gjitha ambasadat dhe konsullatat po zhvillohet një trajnim i ri për punonjësit që shqyrtojnë aplikimet për viza.
Për këtë arsye, intervistat e planifikuara do të shtyhen dhe aplikantët do të njoftohen për një datë të re.
Sipas autoriteteve amerikane, trajnimi synon që zyrtarët të kontrollojnë më hollësisht aplikantët, veçanërisht nëse ata mund të përfundojnë duke u mbështetur te ndihmat financiare dhe shërbimet sociale të shtetit amerikan.
Masa është pjesë e politikës së ashpër të Trump ndaj emigracionit, e cila ka përfshirë dëbime, anulime vizash dhe kufizime të tjera edhe për emigracionin e ligjshëm.
Administrata Trump është përballur edhe me pengesa në gjykata.
Një gjykatës amerikan anuloi së fundmi një politikë që pezullonte vizat e emigracionit për shtetasit e 75 vendeve, duke argumentuar se administrata kishte tejkaluar kompetencat e saj ligjore.
Nuk dihet ende se sa do të zgjasë pezullimi i takimeve.
