Shkup, 12 gusht – “Qytetarët e Çairit e njohin mirë se kush është Bujar Osmani. E dinë se për njëzet vite në politikë nuk ka bërë asgjë për Çairin, as nuk ka ndihmuar askënd nga Çairi. Ai kthehet këtu vetëm kur i duhen votat për të vazhduar karrierën e tij personale politike.
Bujar Osmani është simbol i karrierizmit, një njeri që e ka shfrytëzuar çdo funksion për përparimin e tij personal, e jo për të mirën e qytetarëve.
Si ministër i Shëndetësisë mori amnisti në një rast të Prokurorisë Speciale Publike për furnizime të paligjshme, ndërsa raportet e Entit Shtetëror të Revizionit dokumentojnë shpenzime të paligjshme milionëshe, miliona denar për derivate pa mbulim, servisime të automjeteve pa prova e pa dëshmi, punësime të paligjshme përmes agjencive.
Si ministër i Punëve të Jashtme shpenzoi mbi 120 milionë denar për Samitin e OSBE-së, pa dokumente, pa fatura, pa raporte. E vetmja “fitore” që mbeti në mend është pritja që i bëri ministrit të jashtëm rus Sergej Lavrov, një veprim që i shkaktoi dëm reputacionit ndërkombëtar të shtetit.
Si kryesues i OSBE-së u bë i njohur për qëndrimin pro serb në konfliktin me Kosovën dhe në vend që të ndërtonte partneritet strategjik me Kosovën, organizoi dhjetëra takime me udhëheqësit shtetërorë serbë, duke i hapur tregun kapitalit serb dhe bizneseve të dyshimta.
Si pjesë e qeverisë së BDI-së ishte bashkëpërgjegjës për lejimin e hyrjes së M-TEL-it dhe kazinove serbe në Maqedoni, nga të cilat dy licenca përfunduan në duart e kompanive me prejardhje të diskutueshme serbe dhe malazeze.
Çairi nuk e meriton një njeri që gjithë karrierën e tij e ka kaluar larg problemeve të komunës së tij, që shfaqet vetëm kur i duhet mbështetje dhe që pas vetes lë vetëm borxhe, dyshime dhe skandale.
Çairi do të zgjedhë një njeri që 20 vite ka jetuar dhe ka marrë frymë me problemet e kësaj komune, që i zgjidh problemet e qytetarëve e jo t’i shfrytëzojë ata për pazare dhe përfitime personale.
Më 19 tetor, qytetarët e Çairit do t’i thonë qartë dhe zëshëm, Mjaft, Bujar! Mjaft me karrierizmin tënd!”, thuhet në komunikatën e VLEN-it.
