Shkup, 28 korrik, Zhurnal.mk – Apel drejtuar Qeverisë dhe FZOM-it: Nënat presin me muaj pagesën e kompensimit të lejes së lindjes, raporton Skopje1, transmeton Zhurnal.
Nënat që ndodhen në leje të lindjes po alarmojnë sërish se prej muajsh përballen me vonesa dhe pasiguri rreth pagesës së kompensimit, duke kërkuar reagim urgjent nga Qeveria dhe Fondi i Sigurimit Shëndetësor.
Në rrjetet sociale është publikuar një apel ku thuhet se edhe këtë muaj pagesa ka vonuar, ndërsa nënat nuk kanë asnjë informacion se kur do t’i marrin mjetet që u takojnë me ligj.
„Nuk kërkojmë asgjë më shumë nga ajo që na takon. Leja e lindjes nuk është dhuratë, nuk është mëshirë –është e drejtë e çdo nëne, e cila në periudhën më të rëndësishme të jetës duhet të ketë siguri dhe qetësi për fëmijën e saj“, thuhet në reagimin e një nëne.
Në apel theksohet se pas çdo vonese qëndrojnë familje që duhet të sigurojnë pelena, ushqim, barna dhe të mbulojnë shpenzimet e përditshme, ndërsa institucionet siç thuhet nuk japin asnjë informacion se kur do të kryhen pagesat.
Në adresën redaksionale të “Skopje1” ka mbërritur edhe një dëshmi nga një nënë, e cila thekson se problemi nuk është i ri, por vazhdon prej muajsh.
„Ju drejtohem si nënë në leje të lindjes, por edhe në emër të shumë nënave të tjera që prej muajsh përballen me të njëjtin problem – pagesë të parregullt dhe të pasigurt të kompensimit për lejen e lindjes nga Fondi i Sigurimit Shëndetësor.
Ky nuk është rast i izoluar, por problem që zgjat prej muajsh. Çdo muaj nënat jetojnë në pasiguri, pa asnjë informacion se kur do t’i marrin mjetet që u garantohen me ligj. Në një periudhë kur duhet të jemi të përkushtuara plotësisht te foshnjat tona, detyrohemi çdo ditë të mendojmë si do t’i mbulojmë shpenzimet…“
