Komisioni Qendror i Zgjedhjeve (KQZ) ka përfunduar shqyrtimin e kërkesave të shtetasve shqiptarë që jetojnë jashtë vendit për t’u regjistruar në Platformën Elektronike të Regjistrimit (PER), proces i cili nisi më 11 janar dhe u mbyll më datë 4 mars.
Sipas të dhënave të publikuara në faqen zyrtare të KQZ, 245 975 zgjedhësve u është miratuar kërkesa për të votuar në zgjedhjet parlamentare të 11 majit, ndërsa 48 180 zgjedhëse (unikë) iu është refuzuar kërkesa, ndërsa numri i zgjedhësve (unikë) që bënë kërkesë për regjistrim ishte 294 155.
Në total ishin 365 166 kërkesa të bëra në PER, nga të cilat pas shqyrtimit, 119 139 kërkesa refuzuan.
Numrin më të lartë të kërkesave të miratuara e ka qarku i Tiranës me 52 425 shtetas shqiptarë të regjistruar në PER, i ndjekur nga qarku Fier me 32 559, më pas qarku Elbasanit me 25 196, qarku i Durrësit me 25 034 dhe qarku Korçë me 20 638 kërkesa të miratuara.
Kërkesat për regjistrime janë nga vende të ndryshme të botës. Numri më i lartë i kërkesave të miratuara është nga Italia me 91 223, e ndjekur nga Greqi me 68 223, Gjermania me 25 499 si dhe nga SHBA me 20 653 e Britania e Madhe 17 227.
Sipas gjinisë, përqindjen më të lartë të regjistruesve e kanë meshkujt, me 212 982 kërkesa, ndërsa femrat janë 152 184.
Brenda datës 9 mars, Komisioni Qendror i Zgjedhjeve pritet të publikojë listën paraprake të këtyre zgjedhësve. Emrat e tyre do të hiqen më pas nga lista e votuesve në Shqipëri.
