Tiranë, 20 korrik, Zhurnal.mk – Ministri i Infrastrukturës dhe Energjisë, Enea Karakaçi, inspektoi Portin e Durrësit në kulmin e sezonit turistik, ku janë marrë masat dhe vijon puna për përpunimin e trageteve dhe menaxhimin e fluksit të udhëtarëve gjatë muajve të verës.
Gjatë vizitës, ministri u njoh me masat e ndërmarra nga strukturat portuale për garantimin e një shërbimi të shpejtë dhe të sigurt për qytetarët dhe turistët që udhëtojnë përmes linjave detare.
Drejtori i Portit të Durrësit, Liburn Aliu, informoi ministrin për organizimin e punës gjatë periudhës së fluksit të lartë turistik.
“Nga 1 korriku deri më 15 shtator kemi dyfishim të personelit. Kemi 30 pika, nga të cilat 10 janë për qytetarët, ndërsa 20 të tjera vijojnë punën për përpunimin e mjeteve. Masat janë marrë edhe për inspektimin e vazhdueshëm të hapësirave të brendshme të terminaleve dhe është konfiguruar edhe parkimi”, tha drejtori i portit, teksa bëri të ditur se çdo gjë po shkon mirë.
Ai bëri të ditur se linja e trageteve Durrës–Ankona operon çdo ditë, ndërsa linja Durrës–Bari funksionon dy herë në ditë, nga e enjtja deri të dielën.
Aktualisht në Portin e Durrësit përpunohen 6 mijë pasagjerë dhe 12 tragete në ditë. Po ashtu, është rritur bashkëpunimi me Autoritetin Portual, Policinë dhe institucionet e tjera, për të krijuar shërbim sa më të shpejtë dhe menaxhim sa më efikas të fluksit të vizitorëve.
Gjatë inspektimit, ministri Karakaçi kërkoi vijimin e masave për përballimin e sezonit turistik dhe garantimin e standardeve më të mira të shërbimit në port.
Drejtori i Përgjithshëm i Drejtorisë Detare, theksoi rëndësinë e bashkëpunimit ndërinstitucional për menaxhimin e sezonit.
“Marrja e masave fillon që sa përfundon sezoni, me qëllim reduktimin e problematikave të hasura dhe përgatitjen për sezonin e ri. Bashkëpunojmë me të gjitha institucionet e linjës. Në portet e Sarandës, Vlorës dhe Durrësit, çështja e sigurisë është në gatishmëri të plotë për të shërbyer që nga pritja e trageteve, përpunimi dhe deri te imbarkimi i tyre”, tha ai.
“Jemi në kulmin e sezonit turistik. Në vitin 2025 në Portin e Durrësit janë përpunuar 800 mijë pasagjerë. Mendojmë se do të kemi të njëjtin numër edhe këtë vit. Është i rëndësishëm zbatimi me përpikëri i planit të masave që Autoriteti Portual i Durrësit, por edhe Drejtoria e Përgjithshme Detare, kanë marrë, pasi detyra jonë është që ta bëjmë sa më të thjeshtë hyrjen në Shqipëri të turistëve dhe shqiptarëve që vijnë nga larg”, deklaroi Karakaçi.
