Shkup/Tiranë, 18 tetor, Zhurnal.mk – Solidarizimi i liderit të lëvizjes studentore shqiptare në Maqedoninë e Veriut, Mevlan Ademi, me studentët që po protestojnë në Tiranë kundër kryeministrit Edi Rama, hap një debat mbi qëndrimet politike dhe raportet mes përfaqësuesve të studentëve dhe partive politike në hapësirën shqiptare, shkruan Medial.mk.
Përmes publikimit të fotografive nga protesta, Ademi ka shprehur mbështetjen e tij për studentët dhe zhvillimet në kryeqytetin shqiptar. Ky veprim mund të lexohet si një shenjë solidariteti me kërkesat e studentëve, por njëkohësisht ngre pikëpyetje mbi qëndrimin e tij ndaj politikave të qeverisë së Ramës.
Çështja bëhet edhe më interesante duke pasur parasysh afërsinë që i atribuohet Ademit me Bashkimin Demokratik për Integrim (BDI), parti që ka shprehur mbështetje për politikat e Edi Ramës në Shqipëri.
A nënkupton solidarizimi me studentët edhe pajtim me kritikat e tyre ndaj qeverisë Rama? Apo bëhet fjalë për një mbështetje të përgjithshme ndaj të drejtës së studentëve për të protestuar dhe për të shprehur pakënaqësitë e tyre?
Për momentin, publikimi i Ademit nuk mjafton për të nxjerrë përfundimin se ai është pozicionuar politikisht kundër Edi Ramës. Megjithatë, veprimi i tij e vendos në qendër të një dileme që prek edhe vetë përfaqësimin studentor: a duhet solidariteti me studentët të jetë mbi vijat partiake, edhe kur qëndrimet e tyre bien ndesh me politikat e aleatëve të afërt?
Në fund, mbetet të shihet nëse Ademi do ta konkretizojë këtë solidaritet me një qëndrim të qartë për kërkesat e protestuesve, apo nëse mbështetja e tij do të mbetet në nivelin e një mesazhi solidarizimi.
