Gostivar, 20 korrik Zhurnal.mk – Përballë gjendjes së krizuar epidemike në komunë, Këshilli i Komunës së Gostivarit ka miratuar në mënyrë unanime ndarjen e 600 mijë denarëve për Kryqin e Kuq, mjete të cilat do të shërbejnë për mbështetjen e qytetarëve në nevojë.
Fondet e siguruara do të orientohen drejtpërdrejt në sigurimin dhe shpërndarjen e ujit të pijshëm, probiotikëve dhe artikujve të tjerë bazë për shtresat e rrezikuara. Gjatë kësaj seance të jashtëzakonshme, ku u diskutua situata e re, u apelua për unitet dhe angazhim të përbashkët larg ndarjeve politike.
Gjithashtu, anëtarët e Këshillit mirëpritën nismën për themelimin e një shtabi emergjent krize, i cili pritet të mblidhet urgjentisht për të dalë me masa konkrete. Ndërkohë, nga radhët e këshilltarëve është kërkuar transparencë e plotë institucionale, përfshirë publikimin e rezultateve zyrtare të analizave të ujit nga ujësjellësi vendor për t’i dhënë përgjigje dilemave të qytetarëve.
