Kryeministri Edi Rama ndau sot pamje nga puna për ndërtimin e gjimnazit të ri “Sulejman Elezi” në Laknas, në Bashkinë e Kamzës, që pritet të hapë dyert për nxënësit në fillimin e vitit të ri shkollor, në muajin shtator.
“Me punën për ndërtimin e gjimnazit të ri ‘Sulejman Elezi’ në Laknas, i cili duke filluar nga shtatori do të mirëpresë 600 nxënës, me klasa moderne, bibliotekë, hapësira të gjelbra dhe terrene sportive, duke iu shtuar zinxhirit të shkollave model në Bashkinë e Kamzës,, shkroi Rama në rrjetet sociale, shoqëruar me një video nga kantieri i ndërtimit.
Ky investim i ri arsimor është pjesë e nismës për modernizimin e infrastrukturës shkollore në vend, duke krijuar kushte bashkëkohore për mësimdhënie dhe zhvillim të nxënësve. Shkolla do të jetë e pajisur me ambiente të standardeve të larta, që përfshijnë laboratorë, hapësira për aktivitete kulturore dhe sportive, si dhe ambiente të gjelbra për qëndrim dhe rekreacion.
Ministrja e Arsimit dhe Sportit Ogerta Manastirliu dhe kryetari i bashkisë së Kamzës Rakip Suli inspektuan një ditë më parë punimet për ndërtimin e gjimnazit të ri “Sulejman Elezi” në Laknas, Kamzë.
Gjatë inspektimit të punimeve, ministrja e Arsimit dhe Sportit, Ogerta Manastirliu, theksoi rëndësinë e investimeve në infrastrukturën arsimore.
“Prioriteti ynë është investimi tek fëmijët për mirërritjen dhe zhvillimin e tyre. Nga ajo infrastruktura shkollore, por duke filluar nga çerdhet dhe kopshtet, për ne është një prioritet. Ndaj jemi këtu në një prej shkollave ku tashmë shihet që puna po ecën me ritëm dhe besoj që të bëhemi gati që gjimnazi ‘Sulejman Elezi’ të mundet të hapë dyert në fillim të vitit të ardhshëm, duke ofruar një prej standardeve më të mira, jo vetëm për procesin mësimor, por përtej tij për të qenë një shkollë e hapur për komunitetin me ambiente pritëse, ambiente sportive, kulturore, artistike që mund të shërbejnë nxënësve dhe të gjithë komunitetit të zonës”, theksoi Manastirliu.
Ministrja Manastirliu u ndal dhe te dy investimet e reja arsimore që do të nisin së shpejti në Kamëz.
“Ne, së bashku me ekipin, kemi filluar punën edhe për dy investime të reja në Kamzë. Përveç të gjitha investimeve të reja që janë duke u realizuar falë mbështetjes së Ministrisë së Arsimit dhe Sportit dhe Qeverisë shqiptare, do të jenë gjithashtu dy investime që i përkasin shkollës nëntëvjeçare ‘100 Vjetori’ me ambientet sportive që do të investojmë duke filluar nga ky vit dhe gjithashtu edhe shkolla ‘Dom Nikoll Kaçorri’, e cila do të jetë pjesë e rehabilitimit”, tha Manastirliu.
Në fund ministrja e Arsimit dhe Spotit, Ogerta Manastirliu ndau një panoramë më të gjerë të projekteve në zhvillim në shkallë vendi si dhe te rëndësia e mbështetjes për mësuesit për një arsim sa më cilësor:
“Në të gjithë Shqipërinë jemi duke investuar në rreth 40 objekte arsimore, qoftë për rehabilitimin e shkollave nëntëvjeçare, gjimnazeve, por gjithashtu edhe duke i shtuar mjediseve të shkollave ambientet dhe terrenet sportive kaq shumë të nevojshme për të ndikuar direkt në shëndetin, mirëqenien fizike dhe mendore të fëmijëve tanë. Jemi gjithashtu të angazhuar të vijojmë rritjen e disiplinave sportive dhe paralelisht të vijojmë investimet në kopshte, çerdhe, shkolla për të bërë të mundur një përmirësim të vazhdueshëm të rritjes së standardit të cilësisë së arsimit jo vetëm në infrastrukturë, por edhe në cilësinë e mësimdhënies, ku jemi duke punuar me mësuesit për rritjen e aftësive të tyre përmes trajnimit dhe edukimit në vazhdim”, deklaroi Manastirliu.
Gjimnazi “Sulejman Elezi” në zonën e Laknasit në Kamzë është një investim i mbështetur nga Qeveria e Republikës Federale të Gjermanisë, nëpërmjet Bankës për Zhvillim (KFW).
