Këshilltari i lartë i drejtorit ekzekutiv të EUROPOL, Iliya Pulov, ishte i pranishëm sot në Berat, ku u mbajt mbledhja e Asamblesë së Shoqatës së Shefave të Policisë së Evropës Juglindore (SEPCA).
Gjatë fjalës së tij, Pulov theksoi mbështetjen afatgjatë që EUROPOL i ka ofruar SEPCA-s, duke qenë një partner i vazhdueshëm në aktivitetet e saj dhe në rotacionin e presidencës. Ai nënvizoi rëndësinë e bashkëpunimit të ngushtë për të adresuar sfidat që lidhen me krimin e organizuar dhe terrorizmin në rajon.
“Rajoni i Evropës Juglindore është një zonë me rëndësi strategjike për mbështetjen që jep Bashkimi Evropian për sigurinë në gjithë kontinentin. EUROPOL ka nënshkruar marrëveshje bashkëpunimi me të gjitha vendet anëtare të SEPCA-s, përveç Bullgarisë dhe Rumanisë që janë tashmë pjesë e BE-së”, deklaroi Pulov.
Ai shtoi se të gjitha vendet e SEPCA-s kanë qasje në shkëmbimin e informacionit, përdorimin e aplikacioneve operative, përfshirjen e oficerëve ndërlidhës dhe pjesëmarrjen aktive në takime dhe operacione të përbashkëta.
Pulov vlerësoi rritjen e nivelit të angazhimit të vendeve anëtare të SEPCA-s gjatë viteve të fundit, veçanërisht në kuadër të dy task-forcave të krijuara për luftën kundër migracionit të paligjshëm, trafikimit të qenieve njerëzore, armëve dhe përdorimit të kanaleve kriminale.
Si shembull konkret, ai përmendi operacionin e zhvilluar në tetor të vitit të kaluar, ku me mbështetjen e EUROPOL dhe përfshirjen e autoriteteve nga 26 vende, përfshirë edhe Ballkanin Perëndimor, u arrestuan rreth 300 persona dhe u sekuestruan mbi 200 armë. Në kuadër të këtij operacioni u krijua edhe një grup i posaçëm operativ në Sarajevë.
“Në një shoqëri pa kufij dhe gjithnjë e më të digjitalizuar, është thelbësore të bashkojmë forcat dhe të ndajmë informacionin për të luftuar rrjetet kriminale”, përfundoi Pulov.
