Shkup, 26 qershor – M.I, një prind nga Shkupi, ka reaguar publikisht ndaj një vendimi të ri në shkollën fillore “Zhivko Brajkovski” në Komunën e Butelit, ku djali i tij – nxënës shqiptar – ka marrë dëftesën përfundimtare me faqen e parë vetëm në gjuhën maqedonase, ndërsa përkthimi në gjuhën shqipe figuron vetëm në faqen e dytë.
“Për herë të parë, për më shumë se 50 vite, nuk ka ndodhur kjo që ka ndodh në kohën e ndryshimit.Nxënësi shqipëtarë, shkolla me shumicë shqipëtarë, dëftesa në gjuhen maqedone. Shkolla “Zhivko Brajkovski” komuna Butel. Turp!”, ka shkruar ai në një postim në rrjetet sociale.
Sipas tij, ky ndryshim është bërë me vendim të drejtoreshës së shkollës, pa ndonjë konsultim me prindërit apo nxënësit.
Ky rast ka shkaktuar reagime të shumta në opinionin publik dhe ka hapur debat mbi zbatimin e Ligjit për përdorimin e gjuhëve në Maqedoninë e Veriut, sidomos në institucionet arsimore ku shqiptarët përbëjnë shumicën e nxënësve.
“Si është e mundur që në një shkollë me shumicë shqiptare, gjuha shqipe të shtyhet në prapavijë? Në vend që të ecim përpara me barazi, po bëjmë hapa mbrapa”, u shpreh një tjetër prind për INA.
Kujtojmë se vitin e kaluar, dëftesat për nxënësit shqiptarë në këtë shkollë ishin të shtypura në të dy gjuhët zyrtare në faqen e parë, ndërsa përshkrimi i suksesit me shkrim ishte vetëm në gjuhën shqipe. Ndërsa këtë vit, ky rend ka ndryshuar në mënyrë të njëanshme. (INA)
