Shkup, 10 korrik – Ministri Arben Fetai ka publikuar një përmbledhje të punëve të realizuara nga ekipi i tij në vetëm dy javët e fundit, duke i cilësuar si hapa historikë për drejtësi sociale dhe funksionim të shtetit.
Projektligji për Përfaqësim të Drejtë dhe Adekuat është miratuar në Qeveri, një nismë që Fetai e cilëson “historike” pas më shumë se 20 vitesh premtime të pambajtura nga ish-qeverisjet.
Është zgjidhur përfundimisht çështja e personave pa shtetësi që mbetën të tillë pas shpërbërjes së Jugosllavisë. Sipas UNHCR-së, Maqedonia e Veriut bëhet shteti i parë në rajon që mbyll këtë kapitull.
Qeveria ka miratuar edhe një Strategji të re për Bashkëpunim me Shoqërinë Civile për katër vitet e ardhshme, pas një periudhe të gjatë stagnimi në këtë drejtim.
Po ashtu, është zgjidhur statusi i inspektorëve tatimorë komunalë, të cilët prej vitesh ishin të anashkaluar dhe pa licenca të rregullta profesionale.
“Qytetarët nuk bien pre e mashtrimeve të atyre që vajtojnë për privilegjet personale. Ne po bëjmë punë që u premtuan për dekada, por kurrë nuk u realizuan”, ka deklaruar Fetai.
