Shkup, 10 korrik – Fronti Europian justifikimin se nuk mund të zbatohet interpelancë ndaj kryetarit të kushtetueses për arsyetimin se bëhet fjalë për pushtetin gjyqësor e quan qesharak dhe thonë se është juridikisht i paqëndrueshëm. Deputeti Iliri Hasani tha se deputetët e shumicës njëherë ngritën interpelancë për Këshillin Gjyqësor ndërsa tani thonë se nuk mundet të ngritët interpelancë sepse Gjykata Kushtetuese është pushtet gjyqësor. Sipas tij kjo nuk është mbrojtje e pushtetit gjyqësor, por vendosje e kontrollit ndaj tij.
“Me që realisht ne s’po dimë ta ruajmë shtetin tonë dhe po i thyejmë këto shtylla, baza të shtetit, i bëj thirrje gjitha institucioneve ndërkombëtare, ambasadën e SHBA, Këshillin dhe Komisionin Europian në vendin tonë, të reagojnë në këtë masakër mbi demokracinë dhe rendin kushtetues të shtetit tonë dhe tua bëj me dije se për fat të keq nuk po i përmbahemi aspak rekomandimeve të cilat ata po na japin neve”, tha Ilir Hasani – FE.
Opozita shqiptare kërkoi interpelancë për kryetarin e kushtetueses për shkak të deklaratave të deklaratave të tij lidhur me Ligjin për gjuhët, duke thënë se ai ligj ka shkaktuar kaos në shoqëri. Nga VLEN kritikat e FE-së i quajnë paradoks. Izet Mexhiti përmes një statusi në facebook tha:
“Paradoksi opozitar i “Frontit Kombëtar”. Po flasin për mbrojtjen e interesave kombëtare. Po thërrasin në “bashkim” kundër zhbërjes së të arriturave për shqiptarët. Po nëse të arriturat për shqiptarët zhbëheshkan kaq kollaj, siç pretendojnë për çdo ditë, a do të thotë që për 20 vjet asnjë çështje nuk qenka institucionalizuar?! Zgjidhjet e tyre “madhore” paskan qenë vetëm mashtrim për popullin!”, tha Izet Mexhiti – VLEN .
Ndryshe, dje Kuvendi miratoi rendin e ditës të seancës së 59-të, nga i cili paraprakisht ishte hequr pika për interpelancën ndaj kryetarit të Gjykatës Kushtetuese, Darko Kostadinovski. Kjo pikë u hoq me arsyetimin se “nuk duan të marrin pjesë në dhunë juridike ndaj Kushtetutës”.
