Shkup, 22 korrik – Qeveria VLEN ka miratuar ndryshime të rëndësishme në Ligjin për Shtatzëni të Asistuar Biomjekësore, duke i dhënë mundësi më të gjera çifteve që përballen me infertilitet. Me këto ndryshime, qytetarët e siguruar përfitojnë deri në gjashtë përpjekje për fekondim in vitro, përfshirë edhe përdorimin e qelizave të donatorëve të jashtëm. Ligji i ri heq kufizimet mbi moshën dhe numrin e fëmijëve, duke e bërë atë ndër më gjithëpërfshirësit në rajon.
Valbona Adili Emini deklaroi se ky është një hap për jetën dhe një dëshmi e qeverisjes me fytyrë njerëzore: “Nuk vëmë barriera, por krijojmë mundësi për çdo familje që ëndërron të ketë fëmijë.”
Në vazhdim teksti integral i Adili-Emimi:
Në themel të çdo vendimmarrjeje me vlerë duhet të qëndrojë njeriu, me dinjitetin, shpresën dhe të drejtën e tij për jetë të plotë. Ndër të gjitha dhimbjet që mund të përjetojë një familje, ajo e pamundësisë për të sjellë në jetë një fëmijë është ndër më të thellat. Dhe detyra jonë, si përfaqësues të popullit, është që të ndërtojmë politika që jo vetëm dëgjojnë këtë dhimbje, por i përgjigjen me zgjidhje konkrete.
Pikërisht nga kjo filozofi dhe ndjenjë përgjegjësie njerëzore e institucionale, Qeveria VLEN, ndërmori një hap të rëndësishëm: ndryshimin e Ligjit për Shtatzëni të Asistuar Biomjekësore, që u bë i mundur me ndryshimin e Ligjit për Sigurim Shëndetësor.
Ky ndryshim lejon që qytetarët e siguruar të përfitojnë nga procedurat e fekondimit in vitro, përfshirë: Fekondimin autolog, ku përdoren qelizat riprodhuese të çiftit, ruajtja e lidhjes gjenetike me prindërit biologjikë. Fekondimin alogjenik, ku përdoren qeliza nga donatorë të jashtëm, për rastet kur çiftet nuk kanë mundësi të prodhojnë qeliza të shëndetshme.
Nga tri përpjekje që lejoheshin më parë, me ndryshimet e reja, numri i përpjekjeve rritet deri në gjashtë, duke rritur ndjeshëm shanset për një shtatzëni të suksesshme. Kjo është më shumë se një ndryshim teknik, është një hap i madh drejt drejtësisë shëndetësore, barazisë në trajtim dhe përkujdesjes së mirëfilltë për qytetarin.
Për më tepër, ky ligj është një nga më të avancuarit në rajon, sepse: nuk vendos kufizime në moshë, nuk kufizon numrin e fëmijëve që mund të lindin nga kjo procedurë. Pra, vendi ynë tashmë ofron një nga modelet më gjithëpërfshirëse për çiftet që përballen me sfida të infertilitetit.
Ky nuk është vetëm një ligj, por një angazhim i sinqertë i VLEN-it për të qenë pranë qytetarëve, aty ku politika ka kuptim: në jetën reale, në ëndrrat e prindërve të ardhshëm, në të ardhmen që dëshirojmë ta ndërtojmë së bashku.
Qeverisja jonë është qeverisje me fytyrë njerëzore. Ne nuk bëjmë dallime, nuk vëmë barriera, nuk shpërndajmë premtime boshe, ne krijojmë mundësi.
Ky është një hap për jetën.
Ky është VLEN për njeriun.
Valbona Adili Emini
