Afganistani, një nga vendet më të varfra në botë, është gjithashtu ndër më të prekshmit ndaj efekteve të ndryshimeve klimatike. Vendi është lënë jashtë bisedimeve të Kombeve të Bashkuara për klimën që kur talebanët morën pushtetin në gusht 2021, pasi forcat e udhëhequra nga SHBA-të u larguan nga vendi.
Shoferët e taksive ankohen se është bërë jashtëzakonisht vapë në tre-katër vitet e fundit. Kondicioneri në makinat e vjetra Corolla shpesh nuk funksionon dhe riparimet janë shumë të shtrenjta. Por slogani “bëje vetë” i dha jetë kondicionerëve shtëpiakë. Gjëja më e rëndësishme është që pasagjerët të mos ankohen, shkruan BBC News.
Shoferët e taksive në Kandahar kanë gjetur një zgjidhje unike për të shpëtuar veten dhe pasagjerët e tyre nga nxehtësia. Ata përdorin sisteme ftohjeje të bëra në shtëpi për t’u përballur me nxehtësinë 40°C. Sistemet, të cilat kushtojnë 3,000 afganë (rreth 36 euro), janë të lidhura me një bateri dhe panele diellore të montuara në taksi.
Taksitë blu tani kanë ajër të kondicionuar të montuar në çati me një tub shkarkimi që nxjerr ajër të freskët përmes dritares së pasagjerit. Problemi i vetëm me këtë improvizim është se njësia duhet të karikohet manualisht dy herë në ditë.
