Shkup, 12 gusht – Pretendimet e kryeministrit Hristijan Mickoski se çmimet e produkteve rriten për shkak të rritjes së pagave dhe pensioneve, nuk mbajnë ujë thonë nga opozita. Sipas Fatmir Bytyqit nga LSDM, rritja e pagave dhe pensioneve nuk ka pasur asnjë ndikim tek shporta konsumatore sepse siç thotë, shpenzimet janë rritur dyfish më shumë.
Sipas tij, vlera e shportës sindikale nga 61,855 denarë në mars, shkoi në 65,328 denarë në korrik. Pensioni mesatar në prill ishte 26,163 denarë, e në qershor 26,207 denarë, tha Bytyqi.
“Që do të thotë një rritje shtesë prej 1420 denarëve vetëm për dy muaj. Për të njëjtën periudhë, nuk ka të dhëna për pagën mesatare por trendi i muajve të mëparshëm tregon qartë se rritja e pagave është shumë më e ngadaltë se rritja e shpenzimeve. Fuqia blerëse reale e qytetarëve po bie. Pretendimet se pagat po e shtyjnë inflacionin është ekonomikisht i pa qëndrueshëm”, deklaroi Fatmir Bytyqi, LSDM.
Duke qenë se ende po bëhen analiza para se të merren masa konkrete, kryeministri Mickoski është i vetëdijshëm se masat afatgjate mund të kenë pasoja politike ndaj Qeverisë.
“Pasi e gjetëm problemin se ku është, jemi të vetëdijshëm se mund të ketë edhe çmim politik dhe nuk kemi asnjë dilemë por më mirë që ta paguajmë këtë çmim politik në afat të shkurtër se sa qytetarët ta paguajnë vazhdimisht në afat të gjatë”, tha Hristijan Mickoski, Kryeministër.
Deklaratat e Mickoskit u kritikuan edhe nga “E Majta”. Sipas tyre, të dhënat e shtrenjtimeve janë si rezultat i mos efikasitetit sistematik, praktikave korruptive dhe tolerimit të strukturave të monopolit. Qeveria në vend se të reagojë me masa urgjente dhe të qarta, ofron vetëm paralajmërime të paqarta me analiza që nuk përfundojnë, pa afate dhe pa plan konkret për implementim.
Ndërkaq inflacioni vazhdon të rritet dhe në korrik ka arritur 4,8%. Indeksi i çmimeve me pakicë shënon rritje prej 5,3% në krahasim me muajin e kaluar e harxhimet për jetë 1,1%. Rritje më të madhe ka në shërbimet e transportit dhe atë prej 10%. /Alsat.mk
