Shkup, 3 shtator – Në seancën e sotme gjyqësore për rastin “Shtekli”, në lidhje me shitjen e organizuar të drogës në lagjen Aerodrom, para Gjykatës Themelore Penale Shkup duhet të paraqiten ekspertizat psikiatrike të dorëzuara nga mbrojtja dhe prokuroria për të akuzuarin Rade Trajkovski – Shtekli.
Mbrojtja thotë se Trajkovski vuan nga çrregullime me tipare skizofrenike, ka halucinacione dhe ide paranojake, dhe nuk është i aftë ta ndjekë procedurën gjyqësore. Përkundrazi, prokuroria dorëzoi ekspertizë në të cilën bëhet e ditur se ai është apsikotik dhe i aftë të marrë pjesë në debat.
Gjykatësi Ilia Trpkov në seancën e kaluar paralajmëroi se do t’i thërrasë ekspertët nga të dyja anët që të përballet me mendimet e tyre, pas çka Gjykata do të vendosë cilës ekspertizë do t’i besojë, ose do të urdhërojë ekspertizë të re psikiatrike nëse paraqitet nevoja.
Në seancën e kaluar, katër të akuzuar – Danço Masev, Dimitar Trajkov, Vladimir Veselinovski dhe Branisllav Zajkov – parashtruan propozim për pranimin e fajit, pas çka gjykata mori vendim për ndarjen e procedurës penale.
Akuza, e parashtruar nga Prokuroria për Ndjekjen e Krimit të Organizuar, përfshin gjithsej 10 persona, pas hetimit gati se një vjeçar në të cilin ishin zbatuar masa të posaçme hetuese. Fillimisht ishin përfshirë 16 persona, prej të cilëve shtatë tashmë lidhën marrëveshje dhe morën dënime me burg prej 3 deri 3,4 vjet.
Sipas prokurorisë, grupi ishte organizuar mirë, me role të përcaktuara qartë – nga furnizimi deri në shitjen e kokainës dhe mariuhanës. Droga ruhej në banesa të mara me qira, ndërsa shitej me çmime nga 4.500 deri 6.000 denarë për gram kokainë dhe 200 deri 300 denarë për gram mariuhanë. Komunikimi zhvillohet përmes aplikacionit Snapchat, ndërsa dëshmi kyçe ishin siguruar përmes sistemit „Cellebrite“ për analizë të telefonave mobilë, donacion nga SHBA-ja.
