Shkup, 3 shtator – Me ftesë të Qeverisë, Komisioni i Venecias këto ditë po qëndron në Shkup në kuadër të përgatitjeve të mendimit të tyre për ligjin për përfaqësim të drejtë dhe adekuat. Kjo vizitë e tyre realizohet pas kërkesës së 11 korrikut të Qeverisë për të dhënë mendim për këtë ligj.
Në këtë drejtim, siç bën të ditur zëvendëskryeministrit për politika të qeverisjes së mirë, Arben Fetai në hapësirat e Qeverisë së Republikës së Maqedonisë së Veriut, ekipi qeveritar realizoi një bashkëbisedim të frytshëm duke trajtuar pyetjet dhe çështjet që kanë të bëjnë me projektligjin.
Ky ligj është dërguar për mendim në Komisionin e Venecias për një arsye thelbësore: që ai të jetë plotësisht konform Kushtetutës dhe standardeve evropiane, duke eliminuar çdo hapësirë për interpretime apo kontestime të mëvonshme.
Komisionit të Venecias siç thotë ai, i janë drejtuar me 4 pyetje: A e avancon ky ligj parimin kushtetues të përfaqësimit të drejtë dhe adekuat, duke marrë parasysh vendimin e Gjykatës Kushtetuese për shfuqizimin e Balancuesit? A e promovon projektligji barazinë, nëpërmjet veprimit pozitiv dhe duke eliminuar barrierat e punësimit? A është projektligji në përputhje me parimet e tjera kushtetuese si liritë dhe të drejtat themelore, shprehjen e lirë të përkatësisë etnike, sundimin e ligjit dhe mbrojtjen e privatësisë së të gjithë qytetarëve? Dhe e fundit, a është mekanizëm efikas Trupi koordinues i Qeverisë që themelohet me këtë ligj për sigurimin e respektimit, afirmimit, përmirësimit, avancimit dhe monitorimit të parimit të përfaqësimit të drejtë dhe adekuat?
Besojmë se vlerësimi i Komisionit të Venecias për këto 4 çështje do të jetë garancë për një ligj të fortë dhe të qëndrueshëm, si në aspektin juridik-kushtetues, ashtu edhe në atë institucional.
Me këtë ligj, përfaqësimi i drejtë për herë të parë shndërrohet në një detyrim ligjor të qartë dhe të zbatueshëm për çdo institucion. Ndërkohë, brenda gjashtë muajve do të bëhet harmonizimi i të gjithë legjislacionit sektorial me obligimet që burojnë nga ky ligj.
Pas pranimit të mendimit të Komisionit të Venecias, ligji shumë shpejt do të arrijë në Kuvend dhe do të hyjë në procedurë parlamentare, ku presim të marrë mbështetjen e gjerë që i takon një projekti të tillë gjithëpërfshirës.
“Ky ligj është i vonuar. Ai duhej të ishte miratuar që nga viti 2003. Miratimi i tij do të korrigjojë edhe një tjetër padrejtësi të trashëguar nga regjimi i BDI-së. Ky ligj nuk është për një bashkësi të vetme, por ligj për të gjithë qytetarët dhe për të gjitha komunitetet. Ai paraqet një vizion evropian, ku barazia dhe drejtësia nuk mbeten nocione teorike, por shndërrohen në standarde funksionale që garantojnë integritetin e shtetit dhe besimin e qytetarëve në institucione”, ka thënë Fetai.
Me këtë ligj, shton ai hapim një kapitull të ri për shtetin tonë: përfaqësimi i drejtë nuk është më nocion deklarativ, por një e drejtë e garantuar me ligj, e mbrojtur nga mekanizma të qëndrueshëm institucional.
