Shkup, 5 prill argument.mk/ – Në kuadër të Konferencës Ndërkombëtare “Çairi 2026”, Izet Mexhiti theksoi rëndësinë e rolit të grave shqiptare në politikë dhe në ndërtimin e një shoqërie më të barabartë dhe më të zhvilluar.
Ai nënvizoi se për shumë vite politika dhe vendimmarrja publike kanë funksionuar pa përfshirjen e plotë të grave, duke krijuar një qasje të njëanshme në zhvillimin shoqëror. Sipas tij, mungesa e grave në vendimmarrje ndikon drejtpërdrejt në cilësinë e politikave dhe në progresin e përgjithshëm të shoqërisë.
Mexhiti vlerësoi se sot gratë shqiptare nuk janë më vetëm në kërkim të hapësirës në jetën publike, por po e krijojnë vetë atë përmes angazhimit, lidershipit dhe kontributit të tyre në fusha të ndryshme.
Ai bëri thirrje që institucionet dhe politika të mos mjaftohen vetëm me deklarata për barazi, por të ndërmarrin hapa konkretë për krijimin e mekanizmave që garantojnë përfaqësim të drejtë, mundësi të barabarta dhe mbështetje reale për gratë në proceset vendimmarrëse.
“Një shoqëri që nuk investon në potencialin dhe lidershipin e grave, në fakt e kufizon vetë zhvillimin e saj”, theksoi Mexhiti, duke falënderuar organizatorët për mundësinë e diskutimit dhe shkëmbimit të ideve në këtë konferencë.
https://www.facebook.com/share/p/1B1cfVN25k/
