Shkup, 6 prill, argument.mk/ – Edhe Kryetari i Komunës së Tetovës dhe njëri ndër udhëheqësit e VLEN sot iu premtoi studentëve shqiptarë të juridikut se provimi i jurisprudencës do të mbahet në gjuhën shqipe.
Duke i përgëzuar studentët për protestën e tyre të sotme, në një deklaratë të tij përmes Facebook, Bilall Kasami, tha se kërkesa e tyre do të zgjidhet.
“I përgëzoj studentët për protestën dinjitoze dhe vetëdijen e lartë qytetare që e dëshmuan sot. Kërkesa e tyre është e drejtë dhe, siç ju kam premtuar edhe në takimin tonë të parë, këtë çështje do ta zgjidhim. Për herë të parë pas pavarësisë së shtetit Provimi i Jurisprudencës do të mbahet edhe në gjuhën shqipe!,” shkroi kreu i Tetovës.
Kasami vazhdoi me akuza ndaj BDI-së lidhur me çështjen e pazgjidhur deri më tash.
“Ndërsa elita milionere e ish-pushtetit, e cila tentoi të kontrabandohet në krye të kauzës së pastër studentore, sot dështoi keq. Ky popull i njeh mirë. Tinëzitë e tyre nuk kalojnë.” tha Kasami.
Përkundër premtimeve të djeshme e të sotme, ende mbetet enigmë se si do të realizohen premtimet ndaj studentëve.
Përderisa studentët sot thanë se ligji aktual për përdorim të gjuhëve ua lejon atyre kalimin e jurisprudencës në gjuhën shqipe, enigma mbetet nëse do të bëhet jurisprudenca në shqip me ligjet aktuale apo do të ketë freskim të ligjit të tashëm të ligjit të jurisprudencës.
