Tiranë, 15 maj Zhurnal.mk – Kryeministri Edi Rama gjatë vizitës në kryeqytetin estonez Talin (Tallinn), me rastin e pjesëmarrjes në Konferencën Lennart Meri 2026, u takua sot me presidentin e Republikës së Estonisë Alis Karis. Kreu i qeverisë u mikprit nga presidenti i Estonisë në zyrën e tij, nga ku ndau edhe pamje nga takimi i tyre.
Më herët gjatë ditës së sotme, Rama zhvilloi një takim dypalësh me kryeministrin e Republikës së Estonisë, Kristen Michal në shtëpinë Stenbock, i cili u pasua nga takimi mes dy delegacioneve.
Në përfundim kryeministri Rama dhe kryeministri Michal dhanë një deklaratë të përbashkët për mediet, ku konfirmuan mbështetjen ndaj vendeve respektive dhe forcimin e bashkëpunimit, duke theksuar sidomos aspektin e teknologjisë.
Gjatë vizitës në Estoni, Rama do të marrë pjesë edhe në panelin hapës “Një Urë mbi Ujëra të Trazuara: Kapitulli i Ardhshëm i Bashkëpunimit Transatlantik”, përkrah liderëve dhe përfaqësuesve të lartë euroatlantikë ku diskutimi do të fokusohet në të ardhmen e partneritetit transatlantik, forcimin e shtyllës europiane të NATO-s, sfidat e sigurisë globale dhe rolin e Ukrainës në arkitekturën e re të sigurisë europiane.
Gjithashtu, kryeministri Rama dhe delegacioni shqiptar do të vizitojnë Qendrën e Ekselencës për Mbrojtjen Kibernetike Bashkëpunuese të NATO-s, ku do të takohen me drejtuesit e qendrës dhe do të njihen me veprimtarinë dhe rolin e saj në forcimin e mbrojtjes kibernetike në kuadër të NATO-s.
Pjesë e agjendës është edhe vizita në Memorialin e Viktimave të Komunizmit në Maarjamäe, si dhe ndalesa në e-Estonia Briefing Centre, një nga qendrat më të njohura ndërkombëtare të inovacionit dhe qeverisjes digjitale.
Ndër të tjera, Rama do të japë një intervistë për të përditshmen estoneze “Postimees”, mbi perspektivën e Shqipërisë drejt anëtarësimit në Bashkimin Europian.
