Tiranë, 15 maj Zhurnal.mk – Kryetari i Partisë Demokratike, Sali Berisha tha sot se ministrja e Shtetit për Inteligjencën Artificiale, Diella, nuk ka asnjë element të inteligjencës artificiale dhe e cilësoi atë si një “avatar bosh” të krijuar për të mashtruar opinionin publik dhe për të fshehur, sipas tij, aferat korruptive të qeverisë.
Gjatë një konference me gazetarët, Berisha tha se që në momentin e prezantimit të Diellës si ministre, opozita kishte paralajmëruar se bëhej fjalë për një “blof” dhe një projekt pa funksion real.
Duke iu referuar analizës së një eksperti ndërkombëtar, Patrick Quirk, Berisha tha se ai ka nxjerrë në pah se sistemi nuk posedon asnjë atribut të inteligjencës artificiale dhe nuk ka funksionalitet në luftën kundër korrupsionit.
“Falë ekspertit më të shquar të fushës ndërkombëtare, Patrick Quirk, i cili i ka kushtuar ditë dhe javë të tëra zbërthimit një për një të Diellës, ai nxjerr se ministrja Diella nuk ka absolutisht as edhe një qelizë të vetme të urtësisë artificiale. Zero! Se është një avatar pa asnjë atribut për korrupsionin, pa asnjë ndërfaqe, etj., etj.”, tha Berisha.
Berisha e cilësoi këtë si “krim kushtetues”, teksa shtoi se “është një damkosje tjetër e imazhit të Shqipërisë në Evropë dhe në botë”.
