Tiranë, 25 qershor, Zhurnal.mk – Deputeti i Partisë Demokratike, Luan Baçi tha sot se raporti më i fundit i Dhomës Amerikane të Tregtisë në Shqipëri (AmCham Business Index 2025-2026), përbën një nga aktakuzat më të rënda që i është bërë ndonjëherë modelit ekonomik dhe qeverisjes së vendit.
Në një deklaratë për mediet nga kryesia e Kuvendit, Baçi tha se indeksi i besimit të biznesit ka pësuar një rënie të ndjeshme, duke zbritur në 40,34 pikë nga 100.
“Ky është një sinjal alarmi që tregon qartë se biznesi po humbet besimin tek institucionet, tek tregu dhe tek drejtimi ekonomik i Shqipërisë”, theksoi ai.
Sipas Baçit, “sot kemi një qeveri që flet për investime strategjike, ndërsa biznesi flet për monopole. Qeveria flet për reforma, ndërsa biznesi flet për burokraci. Qeveria flet për rritje ekonomike, ndërsa biznesi flet për korrupsion, pasiguri dhe mungesë konkurrence të ndershme. Kjo është diferenca mes propagandës dhe realitetit”.
Baçi tha se qeveria nuk mund të fshihet më pas propagandës dhe statistikave të manipuluara, duke theksuar se humbja e besimit të investitorëve sjell pasoja të drejtpërdrejta për ekonominë dhe konkurrencën në vend.
Ai lidhi situatën ekonomike edhe me protestat e zhvilluara së fundmi në vend.
“Lufta kundër korrupsionit dhe krimit të organizuar, lufta kundër klientelizmit, kërkesa për arsim dhe shëndetësi me standarde perëndimore, si dhe mbrojtja e pronës publike dhe interesit kombëtar janë në qendër të kërkesave të tyre”, tha ai.
Sipas Baçit, përgjegjësi kryesor për këtë situatë është kryeministri Edi Rama dhe modeli i tij i qeverisjes.
Baçi theksoi se Shqipëria ka nevojë për një model të ri qeverisjeje, ku sundimi i ligjit, konkurrenca e ndershme, lufta reale kundër korrupsionit, mbrojtja e pronës dhe mbështetja për sipërmarrjen të jenë prioritete kombëtare dhe jo slogane propagandistike.
“Koha e justifikimeve ka mbaruar. Raporti i Dhomës Amerikane të Tregtisë është një kambanë alarmi që dëshmon se ekonomia shqiptare po paguan çdo ditë faturën e korrupsionit, klientelizmit dhe keqqeverisjes. Shqipëria meriton më shumë. Shqiptarët meritojnë më shumë. Dhe ky ndryshim nuk mund të presë më”, tha ai.
