Tetovë, 26 qershor Zhurnal.mk – Kryetari i Këshillit të Komunës së Tetovës, Jusuf Abduli, ka reaguar ndaj thirrjeve për protesta në Tetovë, duke vlerësuar se ato kanë për qëllim pengimin e procesit të emërtimit të rrugëve të qytetit.
Sipas tij, ngritja e tensioneve është një përpjekje politike nga ata që, siç thotë, për vite me radhë nuk ndërmorën asnjë hap konkret për zgjidhjen ligjore të kësaj çështjeje, ndërsa tani tentojnë të paraqiten si mbrojtës të interesit publik.
Abduli e cilëson paradoksale që të njëjtët aktorë, të cilët sipas tij e injoruan problemin për vite, sot organizojnë protesta për të manipuluar opinionin publik dhe për të fshehur dështimet e tyre politike.
Ai thekson se protestat nuk mund të zëvendësojnë procedurat institucionale dhe se çështjet ligjore duhet të zgjidhen në institucionet kompetente, veçanërisht në Gjykatën Kushtetuese, e jo përmes presionit në rrugë.
“Nëse ekziston vullnet i sinqertë për zgjidhje, atëherë adresa nuk është sheshi ‘Iliria’, por institucionet shtetërore – në veçanti Gjykata Kushtetuese”, shkruan Abduli.
Në fund të reagimit, ai thekson se Tetova ka nevojë për përgjegjësi, ligjshmëri dhe vendimmarrje të guximshme, e jo, siç shprehet, “spektakle politike dhe kriza të fabrikuara”, duke shtuar se shumë shpejt, përmes rrugëve ligjore dhe institucionale, do të vijnë zgjidhje konkrete për procesin e emërtimit të rrugëve në qytet.
