Tetovë, 26 qershor Zhurnal.mk – Dega e Aleancës për Shqiptarët në Komunën e Bogovinës, në kuvendin e mbajtur sot, ka zgjedhur Mërgim Shabanin për kryetar të degës.
Pas zgjedhjes, Shabani falënderoi delegatët për besimin e dhënë, duke e cilësuar detyrën si një privilegj dhe përgjegjësi të madhe ndaj anëtarëve dhe qytetarëve të komunës.
“Me ndjenjë të thellë mirënjohjeje, dëshiroj t’ju njoftoj se kam marrë besimin e plotë për të udhëhequr degën e Aleancës për Shqiptarët në Bogovinë. Ky rrugëtim është një privilegj dhe detyrim i madh ndaj secilit prej jush”, ka shkruar Shabani.
Ai shprehu falënderime për kuvendarët e degës që e mbështetën me votën e tyre, si dhe një falënderim të veçantë për kryetarin e Aleancës për Shqiptarët, Arben Taravari, për besimin dhe mbështetjen.
“Në bashkëpunim me të gjithë aktivistët dhe strukturat e partisë do të punojmë për forcimin e Aleancës për Shqiptarët në Bogovinë dhe për përfaqësimin sa më të mirë të interesave të qytetarëve”, thuhet mes tjerash në mesazhin e tij.
Shabani e mbylli reagimin me mesazhin: “Na priftë e mbara dhe faleminderit nga zemra!”.
