Bagdat, 29 qershor, Zhurnal.mk – Kryeministri i ri i Irakut, Ali al-Zaidi ka paralajmëruar vazhdimin e një fushate të gjerë kundër korrupsionit, pasi dhjetëra zyrtarë të lartë dhe deputetë, u arrestuan gjatë operacioneve të zhvilluara në fundjavë, në Zonën e Gjelbër të Bagdadit.
Al-Zaidi deklaroi se kushdo që ka përvetësuar fonde publike duhet t’ia kthejë ato shtetit, duke theksuar se “paratë e popullit duhet t’u rikthehen pronarëve të tyre të ligjshëm”.
Ai nënvizoi se zyrtarët e korruptuar nuk gëzojnë “asnjë lloj imuniteti” dhe la të kuptohet se do të ketë arrestime të tjera, duke e cilësuar operacionin e fundit si “vetëm fazën e parë”.
Sipas autoriteteve, 47 persona u arrestuan në orët e para të ditës së djeshme, pas dëshmisë së ish-zëvendësministrit të Naftës, Adnan al-Jumaili.
Hetuesit kanë sekuestruar deri tani, rreth 85 milionë dollarë para në dorë, si edhe dhjetëra prona, automjete, sasi ari, armë dhe municione.
Disa vëzhgues e konsiderojnë këtë si çështjen më të madhe kundër korrupsionit, në Irak që nga rrëzimi i Saddam Hussein në vitin 2003.
Iraku vijon të përballet me korrupsion të përhapur, veçanërisht në sektorin e naftës.
Ndërkohë, analistët vlerësojnë se fushata mund të shërbejë edhe për të konsoliduar pushtetin e al-Zaidi, i cili mori detyrën rreth gjashtë javë më parë, përmes goditjes së kundërshtarëve politikë.
