Tiranë, 01 korrik, Zhurnal.mk – Gjykata e Shkallës së Parë e Juridiksionit të Përgjithshëm Tiranë ka vendosur të ndryshojë orarin e punës së sporteleve që ofrojnë shërbime për qytetarët gjatë periudhës së verës.
Sipas urdhrit të firmosur nga kryetari i gjykatës, Gerd Hoxha, ndryshimi i orarit do të zbatohet nga data 6 korrik deri më 31 gusht 2026.
Gjatë kësaj periudhe, sportelet do të jenë të hapura nga ora 08:00 deri në 13:00. Pas këtij orari nuk do të ofrohen shërbime, me përjashtim të rasteve emergjente.
Në urdhër theksohet se vendimi është marrë për shkak të temperaturave ekstreme që kanë përfshirë vendin tonë dhe që pritet të vijojnë edhe përgjatë muajit korrik. Sipas gjykatës, masa synon të mbrojë shëndetin e punonjësve të gjykatës dhe përdoruesve të saj, duke garantuar njëkohësisht vijimësinë cilësinë dhe standardet e shërbimeve të ofruara për qytetarët.
Urdhri ka hyrë në fuqi menjëherë dhe do të publikohet edhe në faqen zyrtare të gjykatës.
