Tiranë, 02 korrik, Zhurnal.mk – Ministrja e Shtetit për Marrëdhëniet me Parlamentin, Erjona Ismaili, paraqiti sot në Kuvend projektligjin “Për Shërbimin Informativ Kombëtar’, të ndryshuar”.
Ismaili tha se projektligji lidhet drejtpërdrejt me forcimin e kapaciteteve të shtetit për mbrojtjen e sigurisë kombëtare, rendit kushtetues dhe interesave strategjike të vendit tonë.
“Në një kohë kur mjedisi i sigurisë është bërë më kompleks dhe më i ndërvarur, është e domosdoshme që institucionet përgjegjëse të mbështeten në një kuadër ligjor të qartë, bashkëkohor dhe funksional”, u shpreh ajo.
Sipas Ismailit, ligji në fuqi është miratuar në vitin 1998 dhe pavarësisht rolit të rëndësishëm në rregullimin e veprimtarisë së Shërbimit Informativ Shtetëror, disa prej dispozitave të tij nuk pasqyrojnë më realitetin e sotëm.
Ismaili vuri në dukje se, krahas kërcënimeve tradicionale, vendi përballet me sulme kibernetike, kërcënime hibride, veprimtari të shërbimeve të inteligjencës së huaj, cenim të sigurisë ekonomike dhe rreziqe ndaj infrastrukturës kritike.
“Përballë këtyre zhvillimeve, shteti duhet të ketë mekanizma më të mirë për parandalimin, analizimin dhe reagimin, duke garantuar njëkohësisht ligjshmërinë dhe kontrollin institucional”, tha Ismaili.
“Ndryshimet e propozuara synojnë përditësimin e kuadrit ligjor, qartësimin e objektit të veprimtarisë së SHISH-it dhe përshtatjen e tij me përgjegjësitë që Shqipëria ka si vend anëtar i NATO-s dhe në procesin e integrimit të plotë në Bashkimin Evropian”, vijoi ajo.
Ismaili nënvizoi se “projektligji përmban tetë nene dhe përmirëson disa dispozita të ligjit në fuqi, duke reflektuar përvojën e krijuar gjatë zbatimit të tij, zhvillimet e reja në fushën e sigurisë, si edhe standardet e bashkëpunimit me shërbimet partnere”.
Një nga ndërhyrjet kryesore, sipas ministres Ismaili, është qartësimi i objektit të veprimtarisë së SHISH-it, duke përfshirë shprehimisht kërcënimet që lidhen me veprimtarinë e shërbimeve të huaja, terrorizmin dhe ekstremizmin, armët e dëmtimit në masë, kërcënimet kibernetike dhe hibride.
Ismaili theksoi gjithashtu rëndësinë e konceptit të sigurisë kolektive, duke nënvizuar se Shqipëria, si vend anëtar i NATO-s, ka përgjegjësi jo vetëm për mbrojtjen e sigurisë së saj kombëtare, por edhe për kontributin në sigurinë e përbashkët.
“Ky është një hap i nevojshëm për të garantuar institucione më të koordinuara dhe më efektive në mbrojtjen e sigurisë së vendit dhe të qytetarëve”, tha Ismaili.
