Shkup, 20 korrik, Zhurnal.mk – Tragjedia që i mori jetën tre shtetasve të Kosovës në Maqedoninë e Veriut vazhdon të ngrejë shumë pikëpyetje, ndërsa në opinion po qarkullojnë informacione për një pistë të re që, sipas raportimeve, është duke u shqyrtuar nga autoritetet hetimore, raporton KlanKosova, transmeton Zhurnal.
Bëhet fjalë për dyshimet se automjeti me të cilin po udhëtonin viktimat mund të jetë ndjekur nga një veturë tjetër para aksidentit fatal. Deri më tani, nuk ka një konfirmim zyrtar se kjo ka ndodhur, ndërsa autoritetet nuk kanë dalë me një version përfundimtar mbi shkaqet e ngjarjes.
Tre kosovarët u gjetën pa shenja jete brenda veturës së tyre të përmbysur pranë rrugës në afërsi të pikëkalimit kufitar Bllacë, pasi familjarët kishin raportuar zhdukjen e tyre. Pas nisjes së operacionit të kërkimit, policia analizoi kamerat e sigurisë dhe zhvilloi kërkime nga toka dhe ajri, duke lokalizuar automjetin e aksidentuar.
Ndërkohë, raportime të publikuara në media dhe të diskutuara në emisione televizive kanë ngritur dyshime se hetimet po shqyrtojnë edhe mundësinë nëse para aksidentit ka pasur lëvizje të dyshimta ose ndjekje nga një automjet tjetër.
Megjithatë, deri në këtë fazë të hetimeve, nuk ka asnjë konfirmim zyrtar nga policia apo prokuroria që mbështet pretendimin se viktimat janë ndjekur. Autoritetet po vazhdojnë mbledhjen e provave dhe analizimin e të gjitha rrethanave për të zbardhur plotësisht ngjarjen.
Pritet që në ditët në vijim institucionet përgjegjëse të publikojnë informacione shtesë, ndërsa hetimet mbeten në zhvillim.
