Shkup, 27 korrik , Zhurnal.mk – LSDM ka akuzuar institucionet për reagim të vonuar ndaj situatës me kontaminimin e ujit në Gostivar, duke pretenduar se mijëra qytetarë u ekspozuan ndaj rrezikut për shkak të mungesës së informimit dhe masave në kohë.
Në një deklaratë për media, partia thekson se mbi 4.070 qytetarë kanë kërkuar ndihmë mjekësore në Gostivar, ndërsa vetëm gjatë ditës së djeshme janë regjistruar edhe 125 ekzaminime të personave me simptoma dhe një fëmijë është shtruar në spital.
Sipas LSDM-së, uji ishte i kontaminuar me feçe, ndërsa simptomat e para te qytetarët janë shfaqur më 14 korrik.
Partia opozitare pretendon se epidemia është shpallur vetëm më 19 korrik, duke vlerësuar se për pesë ditë institucionet nuk e kanë informuar opinionin dhe nuk kanë ndërmarrë masat e nevojshme.
“Një epidemi u shpall vetëm më 19 korrik. Për pesë ditë të tëra, institucionet nuk e informuan publikun në kohë dhe nuk morën masa. Ndërsa qytetarët përfunduan në turma në ambulanca dhe spitale. Ministri Klekovski konfirmoi se kishte devijime në mostrat. Por paralajmërimi erdhi shumë vonë”, thuhet në reagimin e LSDM-së.
Më tej, partia e cilëson situatën si “kolaps sistemik”, duke vlerësuar se nuk bëhet fjalë për një dështim teknik, por për mungesë përgjegjësie institucionale.
“Ky nuk është një dështim teknik, por një kolaps sistemik. Kur institucionet heshtin ndërsa mijëra njerëz po helmohen, atëherë nuk po flasim më për një gabim. Po flasim për qëndrimin ndaj qytetarëve. Përgjegjësia është e qartë. Pyetja e vetme është se kur dikush do ta marrë më në fund përsipër”, thuhet në deklaratë.
LSDM reagoi edhe ndaj deklaratës së kryeministrit Hristijan Mickoski, i cili njoftoi se nga dita e sotme uji teknik në Gostivar është i pastër, duke ngritur pyetjen: “A i besoni atij?”.
