Shkup, 27 korrik, Zhurnal.mk – Komisioni Rregullator për Energjetikë (KRRE) mori vendim për rritjen e çmimeve me pakicë të derivateve të naftës mesatarisht për 4,55 për qind, kështu, nga mesnata benzina do të shtrenjtohet për 3 denarë për litër, dizeli për 4,5 denarë, ndërsa vaji ekstra i lehtë për amvisëri do të rritet për pesë denarë për litër. Sipas vendimit të KRRE-së, nga 28 korriki në orën 00:01, çmimi maksimal i benzinës EUROSUPER BS-95 do të jetë 93 denarë për litër, ndërsa EUROSUPER BS-98 do të shitet me çmim prej 95 denarë për litër. Çmimi i EURODIZEL BS (D-E V) rritet në 98,50 denarë për litër, ndërsa çmimi i vajit ekstra të lehtë për amvisëri (EL-1) në 98 denarë për litër.
KRRE-ja e rriti edhe çmimin e mazutit M-1 NS për 2,726 denarë për kilogram, me çka çmimi i ri maksimal do të jetë 48,099 denarë për kilogram.
Si arsye për korrigjimin e çmimeve, nga KRRE-ja theksojnë se çmimet referente në tregjet botërore kanë shënuar rritje. Krahasuar me përllogaritjen e mëparshme, çmimet e benzinave janë më të larta për 6,229 për qind, të dizelit për 7,442 për qind, të vajit ekstra të lehtë për 8,051 për qind, ndërsa të mazutit për 8,159 për qind. Në njoftim thuhet se kursi i denarit ndaj dollarit amerikan gjatë periudhës së përllogaritjes ka qenë më i ulët për 0,0397 për qind. Nga KRRE-ja theksojnë se bëhet fjalë për çmime maksimale të përcaktuara dhe se tregtarët me shumicë dhe pakicë mund t’i caktojnë çmimet e derivateve të naftës edhe në një nivel më të ulët se çmimet më të larta të përcaktuara.
