Prishtinë, 7 gusht, Zhurnal.mk – Kryeministri në detyrë, Albin Kurti, pas takimit me kryetarin e LDK-së, Lumir Abdixhiku, ka deklaruar se preferenca e parë e Lëvizjes Vetëvendosje mbetet zgjedhja e një presidenti konsensual, ndërsa në mungesë të një marrëveshjeje të tillë, sipas tij, posti i presidentit i takon subjektit fitues të zgjedhjeve, raporton Ekonomia Online.
Kurti rikujtoi se në zgjedhjet e kaluara kishin garuar me zotimin që subjekti fitues do ta kishte kryeministrin, ndërsa numri dy në listën e tyre, Vjosa Osmani, do të bëhej presidente.
“Asnjëherë presidenti nuk ka qenë nga opozita. Pra, në atë kohë ne patëm garuar paraprakisht me zotimin që subjekti fitues, që më pas doli të ishte Lëvizja Vetëvendosje siç edhe pritej, do ta ketë Kryeministrin, por njëkohësisht që numri dy në listën tonë do të bëhej presidente, përkatësisht zonja Vjosa Osmani. Pra ne atëherë para zgjedhjeve patëm garuar asaj si dhe ka qenë një situatë e periudhës së pandemisë, e pazakonshme”, tha Kurti.
Ai theksoi se preferenca e parë mbetet një president konsensual, por nëse kjo nuk arrihet, atëherë presidenti duhet të vijë nga Lëvizja Vetëvendosje.
“Por tash, natyrisht që preferenca jonë e parë është presidenti konsensual. Por nëse nuk ka president konsensual, edhe nëse vijmë tek presidenti partiak, atëherë është Lëvizja Vetëvendosje. Parti për parti jemi ne. Sepse ne i kemi 53 deputetë, e tre të tjerë së bashku: PDK 22 deputetë, LDK 18 dhe AAK 7, gjithsej bëjnë 47. Pra ne 53, ata 47”, u shpreh ai.
Kurti përsëriti thirrjen që të mos zgjidhet një president partiak, por një figurë që gëzon mbështetje të gjerë.
“Unë po them: Letë mos zgjedhim president partiak. Letë shkojmë me një figurë akademike, profesionist të dëshmuar, me vlera, me kontribute, me merita shoqërore e kombëtare në vendin tonë. Unë besoj që ka dhjetëra të tillë së paku. Një dyzinë sosh unë mund t’ju ia përmend edhe sot këtu”, deklaroi Kurti.
