Shkup, 27 shtator argument.mk/ – Një paciente e re, e cila për shkak të sëmundjes është e palëvizshme dhe ka plagë dekubitale, përkatësisht plagë të shkaktuara nga qëndrimi i gjatë në shtrat, është dashur të dërgohet nga mjekja e saj amë në qendrën kirurgjikale në Tetovë.
Mjekja i ka lëshuar një udhëzim prioritar, pasi nuk ka pasur mundësi ta caktojë përmes sistemit “Termini Im”. Por kjo nuk do të thotë se problemi do të zgjidhet dhe se plaga do të pastrohet patjetër, pasi pacientja mund të kthehet sërish. Për transportin e saj nevojitet automjet mjekësor.
Se sa kompleks është ky problem, mjekja e ka shpjeguar përmes një rasti konkret të ndodhur para disa ditësh.
Më së shpeshti transporti i pacientëve të tillë bëhet me automjetet e Ndihmës së Shpejtë. Transporti nga Shkupi në Tetovë kushton 2.500 denarë, deri në Manastir 7.000 denarë, ndërsa për në Shtip 5.000 denarë.
Nga Ministria e Shëndetësisë nuk është dhënë përgjigje nëse në Shkup ekziston një qendër dhe ekipe mobile për vizita në shtëpi për pacientët me plagë dekubitale, si dhe çfarë ndodh në rastet kur plaga duhet të trajtohet në mënyrë kirurgjikale – nëse ndërhyrja mund të kryhet në institucionin më të afërt që kryen ndërhyrje kirurgjikale apo pacienti duhet të dërgohet në një qytet tjetër.
Mjekët amë pyesin se përse kujdesi shëndetësor që pacientët e merrnin dikur tashmë nuk është më i disponueshëm.
Nëse më parë në rreth dy të tretat e rasteve plagët dekubitale shfaqeshin te pacientët në moshë më të avancuar, sot gjithnjë e më shumë të rinj janë të lidhur pas shtratit dhe zhvillojnë plagë të tilla.
