Shkup, 10 shkurt – Kryetari i LSDM-së Dimitar Kovaçevski duke iu përgjigjur pyetjes së gazetarëve për kandidatët për president të vendit tha sot se janë propozuar disa kandidatë eminentë të mundshëm. Ai theksoi se edhe presidenti aktual Stevo Pendarovski është propozuar nga organizatat komunale, ndërsa janë propozuar edhe ish kryetarë tjerë të shtetit, ish kryetar të LSDM-së, ish sekretarë të LSDM-së dhe ish gjyqtarë të lartë.
Kovaçevski në konferencën e përbashkët për shtyp me kryetarin e Partisë Socialdemokrate të Gjermanisë, Lars Klingbeil i pyetur se sa nominime ka për një kandidat presidencial është përgjigjur se nuk mund ta thotë numrin e saktë, “por që bëhet fjalë për disa kandidatë eminentë të mundshëm”.
“Nuk mund t’ju them saktë se sa kandidatë të mundshëm janë propozuar, sepse nuk i kam numrat. Ata mblidhen në sektorin e sekretarit organizativ. Bëhet fjalë për kandidatë eminent duke përfshirë edhe presidentin Pendarovski i cili është propozuar nga organizatat komunale. Atë që kam mundur të shoh dhe që kemi marrë nga organizatat komunale vetëm konfirmon se LSDM është parti e madhe, parti që disponon potencial të lartë kadrovik dhe që gjithmonë ka kandidatët më të mirë për të gjitha pozitat”, shton Kovaçevski.
