Spekulimet për “zhdukjen” e Princeshës së Uellsit, Kate Middleton kanë vërshuar me të madhe mediet ndërkombëtare.
Së fundmi, një imazh tjetër që kishte shkrepur nga një foto-reporter ku tregonte Princin William dhe Kate-in brenda një makine, ka ngjallur reagime, me disa duke thënë fotografia ishte manipuluar.
Por, paparaci që shkrepi këtë fotografi të hënën i ka mohuar këto akuza.
“Ne nuk i ndryshojmë fotot tona në ‘Photshop’ përveç se rregullojmë nivelet e dritës nëse është e nevojshme”, deklaroi foto-reporteri, Jim Bennett për The Post.
Bennett potencoi se ai dhe një koleg i tij u punësuan nga një gazetë për të shkrepur një foto të Princit William duke shkuar në Westminster Abbey për një ngjarje mbretërore.
“Veturat u larguan nga Kështjella Windsor dhe unë i fotografova ata në një distancë të shkurtër në Rrugën Datchet High – jashtë nr. 39, për të qenë të saktë!” tha ai.
“Imazhet e makinave janë të paparashikueshme edhe në kohën më të mirë dhe me njëfarë reflektimi në xhami, mund të jetë e vështirë”.
“Unë thjesht u sigurova që kisha kapur Princin William, më pas e kuptova se dikush ishte ulur pranë tij. Doli të ishte Kate Middleton”, potencoi ai.
Sqarimi i tij vjen pas spekulimeve se silueta e Middleton ishte manipuluar në foto dhe sqaron gjithashtu keqkuptimet se imazhi u publikua nga familja mbretërore.
