Shkup, 21 mars – Sigurimi i zgjedhjeve të drejta dhe demokratike ishte tema e takimit të sotëm të kryeministrit teknik Talat Xhaferi me kryetarin e Komisionit Shtetëror të Zgjedhjeve, Aleksandar Dashtevski dhe anëtarëve të Komisionit. Kjo, u theksua në mbledhje, është mandat i kësaj Qeverie, por edhe obligim i Komisionit Shtetëror të Zgjedhjeve, njoftojnë nga shërbimi për shtyp i Qeverisë.
Në takimin, i cili u mbajt me ftesë të kryeministrit teknik Xhaferi, ai theksoi se sigurimi i zgjedhjeve nuk do të thotë vetëm siguri në aspektin e rregullimeve ligjore dhe standardeve minimale, por edhe proaktivitet reciprok në mënyrë që të mund të parashikohen krizat potenciale dhe të propozohen skenarë dhe zgjidhje që do të udhëheqin zgjidhjen e atyre krizave.
“Kjo është padyshim e rëndësishme, sepse përveç detyrimeve të tjera, të dy institucionet së bashku kanë detyrimin për të mbrojtur reputacionin e institucioneve dhe për të forcuar besimin e qytetarëve në vetë procesin zgjedhor. Dhe kjo do të arrihet vetëm nëse me veprime vërtetohet se janë marrë të gjitha masat e nevojshme për t’i mbrojtur ata dhe për t’u mundësuar realizimin e të drejtave të tyre”, theksoi Xhaferi.
Kryetari i Komisionit Shtetëror të Zgjedhjeve, Dashtevski, e përshëndeti propozimin e kryeministrit Xhaferi për koordinim, sepse siç tha ai, KSHZ-ja si organ kompetent për mbarëvajtjen e zgjedhjeve, dhe njëkohësisht i pavarur, i paanshëm, i përgjegjshëm dhe profesional në punën e tij, ka nevojë për mbështetje nga institucionet e tjera.
Në takim u shkëmbyen informacione lidhur me përgatitjet e nevojshme për zhvillimin e zgjedhjeve të ardhshme. Të dyja palët theksuan kompetencën ligjore, por edhe vullnetin politik, për procese zgjedhore të lira, të drejta dhe demokratike në zgjedhjet presidenciale dhe parlamentare të 24 prillit dhe 8 majit, të cilat, siç u theksua, si në disa cikle të mëparshme zgjedhore, qytetarët do të bëjnë zgjedhjen e tyre.
Xhaferi theksoi se Qeveria që ai drejton punon në përputhje me rregulloret ligjore për parazgjedhjen dhe se është e vendosur që institucionet kompetente të organizojnë dhe zhvillojnë zgjedhje të ndershme, sipas praktikave dhe standardeve më të mira evropiane.
Konkluzioni i përbashkët i takimit ishte se Republika e Maqedonisë së Veriut është në rrugën evropiane, praktikon vlerat evropiane dhe nevojitet një fokus i fortë nga të gjitha subjektet politike dhe një narrativë e respektit të ndërsjellë, për zgjedhje të ndershme dhe demokratike që do të kontribuojnë në progresin drejt Bashkimit Evropian.
