Shkup, 21 mars – Aleanca për Shqiptarët edhe më tej funksionon me dy krahë derisa në Gjykatën e Tetovës të merret një vendim se cila palë ka të drejtë të vazhdojë me drejtimin e partisë. Por në Gjykatë, siç njoftoi sot Arben Taravari, po bëhen presione mbi gjykatësit, e madje dy herë janë ndëruar gjykatësit që kanë patur në dorë lëndën për ASH-në. Taravari dyshon se këtë po e bën ministri i drejtësisë, Krenar Lloga.
“Është e vërtetë që procedura në gjykatë ka filluar për atë se kush duhet ta udhëheqë Aleancën për Shqiptarët. Para 4-5 ditëve e ndërruan një gjykatëse, se di kush kërkoi por besoj se ministri i drejtësisë dhe e ndryshuan gjykatësen. Lëndën e mori gjykatësja e dytë, pardje e mori gjykatësja e dytë dhe dje përsëri kanë bërë kërkesë që të ndryshohet gjykatësja e dytë. Unë sedi sa kërkesa do të bëhen kështu të ndryshohen gjykatësit derisa t’u goditet një njeri që u duhet atyre”, tha Taravari.
Pyetëm ministrin e drejtësisë Krenar Lloga nëse me të vërtetë ka gisht në gjithë këto ngjarje në Gjykatën e Tetovës. Lloga na tha që Taravari ose ka lajthitur ose është keqinformuar. Thotë se ai si ministër nuk ka gisht në këtë çështje por ndërrimin e gjykatëses e ka kërkuar vet subjekti politik, Aleanca për Shqiptarët.
“Arben Taravari ose është i keqinformuar ose është në lajthitje të plotë dhe për të njejtën duhet të kërkojë falje publike. Ministri i Drejtësisë në asnjë moment dhe në asnjë rast nuk ka kërkuar të ndërrohet ndonjë gjyqtar në ndonjë lëndë. Kërkesën për ndërrim të gjyqtarëve në procedurë të rregullt gjyqësore e ka kërkuar Aleanca për Shqiptarët përmes avokatit të saj. Braktisja e shtëpisë politike nga ana e Taravarit nuk duhet të shoqërohet me shpifje dhe të pavërteta”, tha Lloga.
Përndryshe vendimi nga Gjykata e Tetovës duhet të vijë para datës 2 prill, për faktin që në këtë datë partitë politike duhet t’i dorëzojnë listat e kandidatëve për deputetë. Sipas njoftimeve të mëparshme të KSHZ-së, partitë politike bashkë me listat, duhet të dorëzojnë edhe një vërtetim nga Gjykata, për atë se kush qëndron si kryetar partie. Për momentin, si kryetar partie zyrtarisht edhe më tej qëndron Taravari mirëpo krahu tjetër në konventën e fundit si kryetar e rikthyen Ziadin Selën.
