Shkup, 28 qershor – Prej 21 deri më 27 qershor janë raportuar 40 raste të reja me kollën e keqe, apo një më pak në krahasim me një javë më parë.
Nga rastet e reja, 11 janë shtruar në spital, njoftojnë nga i Instituti i Shëndetit Publik. “Sa i përket shpërndarjes gjeografike, shumica e rasteve janë raportuar në Shkup – 27 ose 67,5 për qind. Tetë raste janë raportuar edhe nga Manastiri, tre nga Tetova dhe dy raste të reja nga Resnja. Mosha e pacientëve sillet nga një muaj deri në 42 vjeç, ndërsa numri më i madh i rasteve janë nga grupmosha 0-4 vjeç – 20, pra 50 për qind. Sa i përket statusit të vaksinimit të të sëmurëve, 27 persona nuk janë të vaksinuar komplet, të pavaksinuar ose me status të panjohur të vaksinimit, gjashtë janë plotësisht të vaksinuar dhe shtatë të vaksinuar sipas moshës,” – thuhet në raportin e ri të ISHP-së.
Deri më 27 qershor, në Republikën e Maqedonisë së Veriut janë regjistruar gjithsej 826 raste të kollës së keqe.
