Shkup, 31 korrik – Komisioni parlamentar për financimin e buxhetit sot në ditën e tretë të debatit rreth amendamenteve për Buxhetin e vitit 2024 shqyrtoi dhe nuk miratoi 10 amendamente, ndërsa një u tërhoq nga propozuesit. Debati vazhdon në orën 16.
Të gjithë 10 amendamentet që nuk janë miratuar janë dorëzuar nga deputetët e Frontit Evropian ku kanë kërkuar mjete për projekte infrastrukturore në komunat Likovë, Dollnen, Saraj, Qendër Zhupë, Gostivar dhe Vrapçisht.
Në arsyetimin e refuzimit të amendamenteve, zëvendësministri i Financave Nikollçe Jankullovski u bëri thirrje komunave që të aplikojnë me projekte në Ministrinë e Transportit dhe Lidhjeve përmes të cilave ka siguruar 107 milionë euro përmes programit për projekte për rindërtimin dhe rehabilitimin e rrugëve lokale, ndërsa nga ky ribalanc prej 12.3 milionë euro shtesë janë paraparë në buxhet për këtë qëllim.
Është tërhequr amendamenti i deputetëve të opozitës Monika Zajkova dhe Bisera Kostadinovska Stojçevska.
Sipas Rregullores, debati rreth amendamenteve duhet të përfundojë për gjashtë ditë. Për ribalancin e buxhetit janë dorëzuar 58 amendamente, por gjatë diskutimit disa prej tyre janë tërhequr nga propozuesit. Komisioni deri më tani nuk ka pranuar asnjë amendament dhe dje dhe pardje ka shqyrtuar dhe ka hedhur poshtë gjithsej 16 amendamente.
