Miliarderi Elon Musk ka pranuar ftesën e presidentit të diskutueshëm të Venezuelës, Nicolas Maduro, për “një ndeshje” në televizionin kombëtar.
Politikani i rizgjedhur së fundmi, i cili përballet me akuzat për mashtrim në zgjedhje, e sulmoi Musk në një fjalim plot zemërim, duke e quajtur “armikun e tij të parë”.
“Rrjetet sociale krijojnë një realitet virtual dhe kush e kontrollon realitetin virtual? Armiku ynë i ri, i famshëm Elon Musk”, tha Maduro.
Komentet e Maduros u bënë shpejt virale, me disa llogari në X që etiketonin Musk në klip dhe pyesnin nëse ai do t’i përgjigjej sfidës së Maduros.
Në përgjigje të sfidës, Musk tha: “Pranoj”.
Bëhet e ditur se CEO i Teslas ka dënuar rezultatet e rizgjedhjes së Maduros, duke e akuzuar atë për mashtrim zgjedhor dhe duke e cilësuar si një “diktator”.
Maduro siguroi 51% të votave në zgjedhjet e Venezuelës, sipas Këshillit Kombëtar Zgjedhor. Ndërkohë, udhëheqësi i opozitës Edmundo Gonzalez mori 44% të votave, megjithëse sondazhet parazgjedhore treguan se ai kryeson me një diferencë të madhe.
Rezultatet janë kundërshtuar nga opozita, e cila i ka bërë thirrje ushtrisë që të ndërhyjë.
Ndryshe, Musk ka pranuar më parë “luftime” të tilla të profilit të lartë.
Siç raportohet, ai ka pranuar edhe një ndeshje në kafaz me Mark Zuckerberg të Metas, por pretendoi se iu desh ta anulonte sepse kishte nevojë për një operacion në shpinë.
