Kërçovë, 1 gusht – Manifestimin kushtuar dy vjetorit të themelimit të Lidhjes së Diasporës kërçovare e shpalli të hapur solistja e talentuar, Isra Elmazi, me këngën kushtuar atdheut, ndërsa të pranishmit fillimisht i përshëndeti kryetari i Lidhjes së Diasporës Kërçovare, Milaim Zyberi, i cili potencoi se ky subjekt ka për qëllim bashkërendimin e aktiviteteve të shoqatave të diasporës dhe përforcimin e lidhjes së mërgatës kërçovare me vendlindjen, si një bashkëveprim që do të jetë në favor të proceseve zhvillimore në hapësirat tona.
Të pranishmit i përshëndeti edhe sekretari organizativ i diasporës së bashkuar kërçovare, Adi Bajrami, i cili me këtë rast prezantoi edhe raportin e detajuar të aktiviteteve të realizuara gjatë vitit 2023.
Ky manifestim u mbyll me interpretimet e bukura të të dy solistëve të grupit muzikor Uskana, Sali Shaban dhe Naser Ballazhi, të cilët ngjallën emocione të veçanta tek të pranishmit e këtij takimi vëllazëror, i cili në të ardhmen synon të jetë tradicional.
