Përderisa partia në pushtet lavdërohet se për gjatë qeverisjes së tyre janë shënuar disa suksese, deputetët opozitarë po bëjnë kritika ndaj tyre, duke numëruar kështu disa nga premtimet që ata kanë bërë dhe nuk kanë realizuar.
Deputetja e Lidhjes Demokratike e Kosovës, Rrezarta Krasniqi, sot gjatë ditës ka reaguar pasi Lëvizja Vetëvendosje bëri të ditur se është mbyllur sesioni pranveror i Kuvendit të Kosovës me 36 ligje të miratuara, prej të cilave 20 marrëveshje ndërkombëtare.
Krasniqi thotë se shumica parlamentare ka qenë e dobët, mashtruese dhe sipas saj qeverisje dështuese.
Ajo ka shkruar më tej për disa nga dëmet që sipas saj qeveria po i sjellë vendit.
“Dështimi për anëtarësim në Këshill të Evropës; Masat sanksionuese ndaj Kosovës; Prishja e marrëdhënieve me miqtë e Kosovës; Mungesa e deputetëve të shumicës në seanca; Arroganca e pushtetit të paaftësisë; Sulme të ashpra ndaj mediave për fjalën e lirë; Dështimet në arenën ndërkombëtare; 10 ligjet antikushtetuese; Pengimi i komisioneve hetimore për të fshehur korrupsionin e pushtetarëve; Janë disa nga shkeljet skandaloze që e karakterizojnë këtë sesion të dobët – të kësaj shumice parlamentare të dobët”, potencoi deputetja.
Mes tjerash ajo ka shkruar se LDK ka votuar marrëveshjet ndërkombëtare.
“Kemi kontribuar për të mirën e shtetit në arenën ndërkombëtare. Kemi dhënë opsione për të dalë nga kriza ekonomike. Jemi përpjekur për minimizimin e pasojave për Kosovën në arenën ndërkombëtare. E kemi respektuar dhe mbrojtur Kushtetutën e vendit. Kosova po paguan një kosto të lartë nga kjo shumicë e dobët dhe e dëmshme”, u shpreh ajo.
Kritika në drejtim të pushtetit sot ka bërë edhe deputeti tjetër i LDK-së, Avdullah Hoti.
Sipas Hotit, në gjashtë muajt e parë të këtij viti janë realizuar vetëm 21% e investimeve kapitale.
“Qindra projekte të parapara në buxhet nëpër ministri të ndryshme nuk kanë nisur të realizohen. Raporti gjashtëmujor i buxhetit vërteton se edhe sivjet po vazhdon trendi i tri viteve të kaluara, ku buxheti për projekte kapitale kalon në suficit. Tani është e sigurt se ky mandat qeverisës do të mbyllet me dështim të plotë në investime kapitale”, thuhet në reagimin e tij në Facebook.
Ndryshe, presidentja e Kosovës, Vjosa Osmani tashmë ka nisur konsultimet me subjektet politike për caktimin e mbajtjes së zgjedhjeve parlamentare.
