Taylor Swift ka folur për herë të parë rreth anulimit të tri koncerteve të saj në Vjenë, të cilat ishin pjesë e turneut të saj madhështor “Eras”, pas një sulmi të dështuar terrorist. Ajo pranoi se ndjeu “një frikë të re” dhe një “ndjenjë të madhe faji”.
Sulmi i planifikuar u zbulua nga autoritetet austriake, të cilat arrestuan tre të dyshuar adoleshentë – të moshave 17, 18 dhe 19 vjeç – për planifikimin e një sulmi islamik në rajonin e Vjenës, me koncertet e Swiftit që ishin “fokus” i këtij komploti, shkruan The Guardian.
Policia tha se i dyshuari kishte shprehur besnikëri ndaj grupit të Shteti Islamik (ISIS) “në javët e fundit” dhe ishte radikalizuar në internet. Kimikate për bomba u sekuestruan në shtëpinë e tij.
Në një postim në Instagram të mërkurën në mbrëmje, duke festuar përfundimin e turneut në Evropë, i cili u mbyll me pesë koncerte në Londër javën e kaluar, Swift ndau “udhëtimin emocional” të saj.
“Anulimi i koncerteve tona në Vjenë ishte shkatërrues”, shkroi ajo. “Arsyeja e anulimit më mbushi me një frikë të re dhe një ndjenjë të madhe faji sepse kaq shumë njerëz kishin planifikuar të vinin në ato koncerte. Por isha gjithashtu shumë mirënjohëse ndaj autoriteteve sepse, falë tyre, ne ishim duke vajtuar për koncertet dhe jo për jetët”.
Këngëtarja falënderoi fansat e saj për “dashurinë dhe unitetin” dhe tha se gjithë energjia e saj ishte përqendruar në mbrojtjen e “gati gjysmë milioni njerëzve që kishin ardhur për të parë koncertet në Londër” pas anulimeve në Vjenë.
“Ekipi im dhe unë punuam dorë për dore me stafin e stadiumit dhe autoritetet britanike çdo ditë për të arritur këtë qëllim, dhe dua t’i falënderoj për gjithçka që bënë për ne”, shkroi Swift. “Le të jem e qartë: Unë nuk do të flas publikisht për diçka nëse mendoj se duke bërë këtë mund të provokoj ata që do të dëshironin të dëmtojnë fansat që vijnë në koncertet e mia”.
Postimi në Instagram ishte i pari që Swift ndau që nga incidenti në Vjenë. Ajo pranoi heshtjen e saj gjatë javëve ndërmjetëse, duke e quajtur atë një formë “vetëpërmbajtjeje dhe pritjeje për të shprehur veten në një kohë të përshtatshme”.
“Prioriteti im ishte përfundimi i sigurt i turneut tonë në Evropë, dhe me një lehtësim të madh mund të them se e arritëm këtë”, tha ajo.
Koncertet e Swift në Vjenë ishin planifikuar për datat 8, 9 dhe 10 gusht në stadiumin ‘Ernst Happel’. Fillimisht, autoritetet kishin thënë se koncertet mund të vazhdonin me masa shtesë sigurie, por më vonë u anuluan për shkak të një “rreziku abstrakt”, sipas shefit të policisë së Vjenës, Gerhard Purstl.
Swift do të kthehet në Amerikën e Veriut në nëntor dhe dhjetor për disa koncerte në Kanada, që do të përfundojnë turneun “Eras” – një spektakël gjigant që është bërë turneu me të ardhurat më të larta në histori, duke gjeneruar më shumë se një miliard dollarë amerikanë dhe duke shkaktuar aktivitet sizmik në disa raste.
