Shkup, 17 shtator – Më lejoni të ndaj me ju gëzimin që sot jemi të gjithë bashkë në shtëpinë e demokracisë në vendin tonë.
Ky është vendi i duhur, me rastin e Ditës Ndërkombëtare të Demokracisë, për të dërguar mesazhe për përkushtimin tonë për t’i kultivuar vlerat demokratike, si të drejtat e njeriut, zgjedhjet e lira dhe të drejta, barazia para ligjit, kufizimet kushtetuese të pushtetit, pluralizimi shoqëror, ekonomik dhe politik, toleranca, bashkëpunimi dhe kompromisi.
Jemi këtu për të dërguar mesazh për të mbështetur diversitetin, për të përmirësuar gjithëpërfshirjen dhe drejtësinë në shoqëri dhe mbi të gjitha për të respektuar çdo individ.
Meqë ky është thelbi i demokracisë, si vlerë thelbësore e botës moderne: Krijimi i kushteve për integrim në shoqëri për çdo individ, pavarësisht nga përkatësia etnike, gjinia, feja, pozita shoqërore ose përcaktimi politik. Kjo është baza për mbajtjen e të rinjve në vendin tonë, sepse demokracia nuk është diçka e mirëqenë, por duhet të përmirësohet vazhdimisht.
Maqedonia e Veriut është ende një demokraci e re, e konceptuar me Kushtetutë si shtet civil dhe demokratik, që i garanton të drejtat e njeriut, liritë civile, barazinë kombëtare dhe drejtësinë sociale.
Në këto 33 vite, ne kemi praktikuar demokracinë, duke mësuar njëkohësisht vlerat e saj dhe duke kuptuar rëndësinë e parimeve të saj. Një nga mësimet që kemi përvetësuar është se baza e demokracisë është dialogu, veçanërisht ndërmjet faktorëve politikë në shoqëri, mbi të gjitha ndërmjet deputetëve, si përfaqësues të zgjedhur të popullit.
Sipas citatit të njohur të Abraham Linkolnit, demokracia është pushteti i popullit, përmes popullit dhe për popullin: “I popullit” – si bartës i sovranitetit, që e jep mandatin për të ushtruar pushtetin; “Përmes popullit” – pushteti ushtrohet ose përmes përfaqësuesve të zgjedhur të popullit ose përmes pjesëmarrjes së drejtpërdrejtë të qytetarëve; “Për popullin” – pushteti ushtrohet në interes të popullit dhe të së mirës së përgjithshme.
Parlamenti ynë i ka të gjitha mjetet e nevojshme për të avancuar politikat dhe kornizat ligjore për sundimin e së drejtës dhe për të parandaluar dhe mbrojtur nga diskriminimi. Prandaj duhet të punojmë së bashku për zhvillimin e demokracisë në vend.
Në kohën e përparimeve të dukshme të tendencave autoritare dhe populiste edhe në demokraci shumë më të vjetra dhe më të zhvilluara, nevojitet përkushtimi i fortë për të ruajtur dhe forcuar vlerat dhe parimet demokratike, duke thyer më tej paragjykimet dhe stereotipet.
Besoj se qëllimi ynë kolektiv është të krijojmë terren që brezat e rinj të jetojnë në një mjedis ku idetë, njohuritë dhe integriteti i personit janë në radhë të parë dhe ku diversiteti është motor i përparimit dhe jo arsye për ndarjet.
Nga ky aspekt, duke artikuluar këndvështrime dhe interesa të ndryshme të deputetëve, si përfaqësues të popullit, Kuvendi është adresa e duhur për forcimin e kulturës demokratike dhe për avancimin e debatit politik.
