Rikthim në Shëngjin, një port në anën tjetër të Adriatikut që ishte pak i njohur … ndërsa tani është në qendër të vëmendjes si qendra e parë (dhe e diskutueshme) jo-evropiane për riatdhesimet e emigrantëve, është vendimi i qeverisë së kryeministres Meloni, shkruan corriere.it.
Pothuaj 17 ditë pas mbërritjes së azilkërkuesve të parë dhe 15 ditë pas kthimit të tyre drejt Italisë pas ndalimit të gjyqtarëve, Roma zyrtare provon sërish të aktivizojë këtë qendër.
Nga e hëna ”Libra”, anija e Marinës, do të kthehet në stacionin e saj 20 milje nga Lampedusa për të patrulluar ujërat dhe për të mirëpritur refugjatët e shpëtuar në Mesdhe duke kryer kështu kontrollet e para në bord dhe për të devijuar ata që janë “të përshtatshëm” për në Shqipëri, një proçedurë jo pak e diskutueshme.
Një dispozitë me një shtrirje më të gjerë se indikacionet e Gjykatës së Drejtësisë së BE-së, për të cilën magjistratët e Romës më 18 tetor autorizuan ndalimin e emigrantëve në qendrat shqiptare të ndërtuara nga Italia.
Në thelb, vendimi i gjykatës së Romës vendosi se “procedura e përshpejtuar e kufirit” nuk mund të zbatohet për emigrantët që vijnë nga vende që konsiderohen të sigurta vetëm nga Italia dhe jo nga legjislacioni evropian.
Tashmë është e qartë se për Gjykatën e Drejtësisë së BE-së një vend nuk mund të përkufizohet si i sigurt nëse edhe një pakicë e vogël qytetarësh janë në rrezik dhe i takon gjyqtarit përgjegjës që të dallojë rast pas rasti nëse riatdhesimi do të rrezikonte jetën e personit.
Prandaj, Roma, nëse do të ndiqeshin kriteret e Gjykatës së BE-së, do të duhej të rishikonte listën e saj të vendeve të sigurta, duke përjashtuar për shembull Tunizinë, Egjiptin apo Bangladeshin nga ku vijnë shumica e azilkërkuesve.
Pas grindjeve të nxehta politike dhe polemikat mbi kostot e operacionit, qeveria italiane po përpiqet sërish të aktivizojë qendrën e pritjes në Shëngjin.
Më 21 tetor ajo miratoi një dekret ligjor që shënon përmirësimin e listës së saj të “vendeve të sigurta”, e cila kaloi nga e drejta dytësore në atë parësore, me qëllim forcimin e saj dhe vendosjen e saj si prioritet, në hierarkinë ligjore, në lidhje me indikacionet e Gjykatës Evropiane.
