Tiranë, 02 tetor, argument.mk/ – Instituti i Statistikave (INSTAT) dhe Eurostat zhvilluan misionin vjetor në Shqipëri, me fokus forcimin e Sistemit Kombëtar Statistikor dhe përmbushjen e kërkesave të procesit të integrimit të vendit në Bashkimin Evropian.
Misioni u zhvillua më 30 shtator–2 tetor 2026, ku drejtuesja e përgjithshme e INSTAT, Lantona Sado, së bashku me drejtues dhe ekspertë të institucionit, zhvilluan takime me përfaqësues të Eurostat dhe delegacionit të Bashkimit Evropian në Shqipëri.
Në diskutime morën pjesë edhe përfaqësues të Ministrisë së Financave dhe Bankës së Shqipërisë, duke vënë në fokus rëndësinë e bashkëpunimit mes institucioneve për zhvillimin e statistikave zyrtare.
Takimet u përqendruan te zhvillimet dhe prioritetet e Sistemit Kombëtar Statistikor, përmbushja e standardeve dhe kërkesave të BE-së, si dhe progresi i Shqipërisë drejt mbylljes së Kapitullit 18 – Statistikat.
Misioni shërbeu për të vlerësuar ecurinë e deritanishme, për të përcaktuar prioritetet e ardhshme dhe për të identifikuar hapat që do të ndërmerren në funksion të përafrimit të mëtejshëm të statistikave shqiptare me standardet evropiane.
Bashkëpunimi me Eurostat dhe institucionet e BE-së konsiderohet një element i rëndësishëm në forcimin e cilësisë, krahasueshmërisë dhe besueshmërisë së statistikave zyrtare, në mbështetje të procesit të integrimit evropian.
