Shkup, 10 nëntor – Policia ka gjetur disa objekte që dyshohet se i përkasin 43-vjeçares Lidija Trajkovska, e cila është shpallur e zhdukur që nga e premtja dhe për herë të fundit është parë në një stacion autobusi në fshatin Jurumleri të Shkupit.
Nga MPB bëjnë të ditur se kanë konstatuar lëvizjen e gruas – ajo është nisur nga Jurumleri përgjatë rrugës që shpie në Draçevë. Në atë rrugë, në afërsi të urës së lumit Vardar, gjatë kontrollit të djeshëm në terren janë gjetur një kuti cigare, një çakmak dhe një xhemper.
“Burri i saj ka njohur kutinë e cigares dhe çakmakun, pra është konfirmuar prej tij se janë të sajat, ndërsa ka deklaruar se pulovra nuk ishte e saj. Gjithashtu, zyrtarë policorë nga SVR Shkup, së bashku me qytetarët dhe familjarët e të zhdukurve, kanë bërë xhiro përgjatë rrjedhës së lumit Vardar”, thonë nga MPB.
Policia në kërkim po përdor edhe dron, me të cilin ka fluturuar mbi brigjet e Vardarit në një gjatësi prej gati pesë kilometrash në jug, deri në fshatin Ognjanci. Janë kontrolluar rrethinat më të gjera dhe objektet e braktisura në këtë zonë. Sipas MPB-së, kërkimet vazhdojnë intensivisht edhe sot, deri në gjetjen e gruas së zhdukur.
Ndryshe, vëllai i Lidijes, Aleksandar Josiq, në një bisedë për 24Info, ka theksuar se nuk është i kënaqur me mjetet e investuara nga MPB-ja e Maqedonisë, ata po luten për përfshirje më të madhe në këtë rast dhe thonë se tashmë kanë kërkuar ndihmë nga Ministria e Brendshme e Serbisë, dhe ata do të vazhdojnë të kërkojnë ndihmë nga të gjithë vendet fqinje. Ata kërkojnë që në kërkim t’i bashkohet edhe një qen nuhatës, por siç u është thënë aktualisht është vetëm një qen që nuk mund t’i bashkohet kërkimit.
