Një ditë përpara seancës gjyqësore për rishikimin e masës së arrestit në Gjykatën e Apelit (GJKKO), kreu i Partisë së Lirisë, Ilir Meta ka kërkuar që mbështetësit e tij të distancohen nga grumbullimet dhe protestat para gjykatës, sepse sipas Metës, beteja e tij është me drejtësinë.
“Jam në dijeni të iniciativave të personave të paautorizuar nga unë apo spontane për të protestuar përpara gjykatës. Ju bëj me dije se veprime të tilla janë të padobishme dhe të dëmshme. Betejën time ligjore e kam bazuar në parashtrimin e gjithë të vërtetave përpara gjykatës duke denoncuar inekzistencën e provave ndaj meje në këtë proces kryekëput politik”, tha Meta në një postim në rrjetet sociale.
Kreu i Partisë së Lirisë kërkoi që të shmangen të tilla organizime në ditët e seancave gjyqësore ndaj tij, sepse ato, siç u shpreh Meta, largojnë vëmendjen nga gjykimi dhe krijojnë shpërqendrim të opinionit publik nga thelbi i çështjes.
“Në këto kushte, çdo grumbullim apo protestë para gjykatës në ditën e gjykimit i konsideroj si shpërqendrim të opinionit publik ndaj thelbit të çështjes, ndaj ju bëj thirrje të distancoheni nga çdo iniciativë për grumbullime dhe protesta”, përfundoi Meta.
