Komisioni për Punë të Jashtme dhe Diasporë i Kuvendit të Kosovës ka pritur në takim anëtarët e Komisionit për Buxhetin e Shtetit dhe Çështjet Financiare të Parlamentit Bavarez të Republikës Federale të Gjermanisë të kryesuar nga Josef Zellmeier, raporton Anadolu.
Në këtë takim, ku nikoqir ishte komisioni kosovar, anëtarët e komisionit të Parlamentit Bavarez u pritën nga deputetët Xhavit Haliti, Yllza Hoti, Gazmend Gjysinca dhe Time Kadrija.
Deputetët kosovarë shprehën mirënjohje për kontributin dhe mbështetjen e Gjermanisë, në etapa të ndryshme dhe aktualisht.
Anëtarët e komisionit të Parlamentit Bavarez u pritën edhe nga kryetari i Kuvendit të Kosovës, Glauk Konjufca, i cili në takim me ta potencoi lidhjen e ngushta mes dy shteteve dhe kontributin e madh të mërgatës kosovare e cila jeton dhe punon në Gjermani, përfshirë rajonin e Bavarisë.
Konjufca në këtë takim ka folur mbi nevojën që bashkëpunimi i ngushtë mes dy vendeve të thellohet edhe më tutje dhe në të gjitha fushat, duke përfshirë edhe atë parlamentare.
Kryetari i Komisionit për Buxhet dhe Financa të Parlamentit të Bavarisë, Josef Zellmeier, në emër të tij dhe të pjesëmarrësve të tjerë shprehu nevojën e thellimit të raporteve të mira, sidomos mes Kuvendit të Republikës së Kosovës dhe Parlamentit të Bavarisë. Ai shprehu gatishmërinë për angazhim në drejtim të këtij bashkëpunimi dhe nevojën për tejkalimin e sfidave që dalin përpara.
